Забур жырлары 8

Адамға салтанат сыйлаған Жаратқан Иені мадақтау

1 (Ән-күйдің жетекшісіне арналған, ғаттық жетігеннің*8:1 Яки: ішекті аспаптың. сүйемелдеуімен айтылатын Дәуіттің жыры.)

2 Уа, Жаратқан Тәңір, Иеміз біздің,

Бүкіл дүниеде әйгілі Өзіңнің

Сондай айбынды да даңқты есімің!

Көктен биік мерейіңді өсірдің.

3 Балалардың, кішкене бөбектердің

Аузымен Өзіңді дәріптетесің.*8:3 Немесе: Өзіңнің құдіретіңді дәріптетесің.

Дұшпандарыңа бола солай істейсің,

Қас жауыңды, кекшілді үндетпейсің.

4 Сенің қолыңнан шыққан аспаныңа,

Өзің орнатқан ай мен жұлдыздарға

Назар аударған әрбір уақытымда

Мынадай сұрақтар туады ойымда:

5 Өзің ескеретіндей адам сонша кім,

Сен қамқорлайтындай адам баласы кім?

6 Оны көктегілерден*8:6 Яки: періштелерден. Немесе: Құдайдан. сәл төмен қойдың,

Құрмет, салтанатты оған тәждей сыйладың.

7 Сен адам баласын билеуші еттің

Қолыңнан шыққан бар жаратылысқа.

Бәрін де оған бағындырып бердің:*8:7 Немесе: оған аяқ асты қылып бердің (Жар 1:28).

8 Бүкіл ірілі-ұсақты малдарды да,

Даладағы жабайы аңдарды да,

9 Самсаған құс пен судағы балықты,

Теңіз ағыстарымен жүзгендерді

Табыстадың Сен оның қол астына.

10 Уа, Жаратқан Тәңір, Иеміз біздің,

Бүкіл дүниеде әйгілі Өзіңнің

Сондай айбынды да даңқты есімің!