Забур жырлары 23

Сиондағы киелі үйге бару

1 (Дәуіттің жыры.)

Жер жүзі мен ондағының бәрі Жаратқандікі,

Бұл дүние мен онда тұрғандар түгел Онікі,

2 Жердің негізін Ол теңіздің түбіне орнатты,

Ағындардың үстінен берік етіп нығайтты.*23:2 103:5.

3 Жаратқанның тауына кімнің шығуына болады,

Оның киелі орнында*23:3 Яғни Иерусалимдегі Сион тауында орналасқан киелі үйдің ауласында (2:6; 14:1; 64:5; Пат3 8:22,64-65). кімнің тұруына болады?

4 Бұл тек қолы мен жүрегі таза жанға болады,

Жат тәңірге табынбай,*23:4 Яғни шынайы емес, жалған тәңірге сиынбайтын. жалған айтпайтынға болады.

5 Осындай жанды Жаратқан Ие жарылқайды,

Құтқарушы Құдай оны рақыммен ақтайды.

6 Уа, Құдай, тек бұлар Сенің алдыңа барады,

Жақып сиынған Құдай, олар Саған бет бұрады.

7 Ей, көне қақпалар, айқара ашылыңдар,

Ежелгі есіктер, кеңінен ашылыңдар,

Кіре алсын даңққа бөленген Патша!*23:7 Мұнда Жаратқан Иенің Келісім сандығының салтанатпен киелі үйге кіргізілуі жайлы айтылған (67:8-11,17-19; Пат3 8:6,9-13).

8 Кім екен осы даңққа бөленген Патша?

Ол — құдіреті күшті Жаратқан Ие,

Шайқаста құдіретті Жаратқан Ие!

9 Ей, көне қақпалар, айқара ашылыңдар,

Ежелгі есіктер, кеңінен ашылыңдар!

10 Кім екен осы даңққа бөленген Патша?

Әлемнің Иесі, Сол — даңқталған Патша!