Забур жырлары 55

Жаулар тап бергенде Құдайға сенім білдіру

1 (Ән-күйдің жетекшісіне арналған, «Алыстағы үнсіз көгершін» әуенімен айтылатын Дәуіттің мінажаты. Ол філістірлердің Дәуітті Ғат қаласында ұстап алған кезіне*55:1 33:1; Пат1 21:10-15. арналған.)

2 Уа, Құдай, бола гөр маған мейірімді,

Адамдар ұмтылады таптауға мені,

Күні бойы қыспақтап, тап береді.

3 Жауларым күнде қудалап өкшелейді,

Менмендер маған қарсы бас көтереді.

4 Қорыққанда Саған артам сенімімді.

5 Құдайға сеніп енді қорықпаймын,

Берген сөзі үшін Оны мадақтаймын,

Сонда пенде не жасай алады маған?

6 Күнде жаулар сөздерімді бұрмалайды,

Әрдайым маған қарсы қастық ойлайды,

7 Жасырынып бір жерге жиналады,

Бар қадамдарымды бақылап тұрады,

Аңдып жанымды алуға ұмтылады.

8 Уа, Құдай, сұм істерімен құтылтпашы,

Сол қыңыр ұлттарды қаһарыңмен құлдыратшы.*55:8 Яки: Өзіңе мойынсұнбайтын ұлттарды (немесе: топтарды) қаһарыңмен құлдыратшы.

9 Шарасыздығымды ұмытпай ескересің,

«Құтыңа» жинап қой көз жасымның бәрін,

Жазылған жоқ па олар кітабыңда Сенің?*55:9 138:1-3; 38:12; Пат4 20:5; Дан 12:1; Мал 3:16.

10 Сиынып сұрасам қолдауыңды Сенің,

Кері шегінеді жауларым менің,

Құдайдың маған жар екенін білемін.

11 Берген сөзі үшін Құдайды мадақтаймын,*55:11 55:5.

Берген уәдесі үшін Иемді даңқтаймын.

12 Құдайға сеніп енді қорықпаймын,

Сонда пенде не жасай алады маған?

13 Уа, Құдайым, мен Өзіңе бағыштаймын

Берген уәдеме сай шүкірлік тартуларын.*55:13 65:13-14; Леу 3; 7:11-18.

14 Өйткені аяғымды сүрінуден сақтадың,

Жанымды ажалдың аранынан құтқардың.

Осылай Сен мені Өзіңнің алдыңда

Аман жүрсін дедің өмірдің нұрында.*55:14 (Әйүп 33:30) Яки: Аман жүрсін дедің тірілердің (жарық) әлемінде (114:9).