Забур жырлары 92

Ұлы Патшаның мәңгілік билігі

1 Жаратқан Ие — Патша, Ол билік жүргізуде,

Ұлылыққа бөленіп, кенелген құдіретке.*92:1 Немесе: құдіретпен белін бекем буған.

Орнынан қозғалмастай берік орнатылған әлем,

2 Сенің құрметті «тағың» ежелден бекітілген,

Уа, Ием, мәңгі бақи бар болып келесің Сен.

3 О, Жаратқан Ие, өзендер тасып күркірейді,

Теңіз де толқындарын тұрғызып дүркірейді,

4 Бірақ мол сулардың қатты шуылынан гөрі,

Теңіз жағасына соққан толқындардан гөрі

Көктегі Жаратқан Иенің құдіреті күшті!

5 Уа, Ием, ережелерің шынымен сенімді,

Сенің үйің мәңгілік киелі де қасиетті.