Забур жырлары 22

Ізгі Бағушы

1 (Дәуіттің жыры.)

Жаратқан Ием — менің Бағушым,

Мен еш нәрседен де тарықпаймын.

2 Ол мені жасыл жайлауға жаяды,

Тұнық суға жетелеп апарады.

3 Ием жаныма күш дарытады.

Есімі «Қасиетті» деп аталады,

Содан артамын Оған сенімімді:

Ол мені тура жолмен жетелейді.

4 Қап-қараңғы шатқалда*22:4 Немесе: Өлім қаупі төніп тұрған шатқалда. жүрсем де мен,

Қорықпаймын ешбір қауіп-қатерден,

Себебі Өзің менің қасымдасың,

Жігер береді сойылың мен таяғың.

5 Сен маған дастарқан жаясың

Көз алдында дұшпандарымның,

Мені құрметпен қарсы аласың,

Тостағанды толтыра құясың.*22:5 Немесе: Сен маған дастарқан жайып, басыма иісмай жағып (44:8), тостағанымды ернеулетіп толтырып бересің.

6 Жақсылық пен мейірімділік

Үлесім болады өмірлік,

Жаратқан Иенің үйінде

Мен қала беремін мәңгілік.