Забур жырлары 25

Әділ жанның Жаратушыдан қолдау сұрауы

1 (Дәуіттің жыры.)

Төрелік айтып мені ақташы Өзің,

Уа, Жаратқан Ием, адал жүріп келемін,

Саған сенім артып еш күдіктенбеймін.

2 Тексер мені, уа, Жаратқан, байқап көр,

Жүрегім мен ой-санамды сынап көр.*25:2 Яки: Бүйрегім (ішкі дүнием) мен жүрегімді «балқытып» сынап көр. (Ежелгі зергерлер металды көрікте балқытып, сапасын тексерген.)

3 Өйткені көз алдымда мейірімің, Сенің

Ақиқат жолыңмен жүріп келемін,

4 Өтірікшілермен бірге отырмаймын,

Зымияндармен де бірге жүрмеймін.

5 Арамзалар жиынын еш жаратпаймын,

Зұлымдармен ешқашан отырмаймын.

6 Қол жуып адалдығымды білдіремін,*25:6 Таза қол адалдықтың сыртқы белгісі болатын (23:4).

Құрбандық үстеліңді айналып жүремін,

7 Уа, Ием, мадақтап Сені әндетемін,

Керемет істеріңді паш етемін.*25:7 Исраилдіктер құрбандық үстелінде құрбандықтар мен сый-тартулар ұсынғаннан кейін жиналған жамағаттың алдында Жаратқан Иені рақымы мен жарылқауы үшін мадақтайтын (42:4).

8 Сен тұратын қасиетті үйіңді,

Ұлылығың мекендейтін орынды*25:8 Яки: Сенің нұрлы салтанатпен мекендейтін (жер бетіндегі) тұрағыңды (Мыс 29:43; 40:34-35; Шеж2 6:18-19; 7:1-2).

Сондай сүйемін, уа, Жаратқан Ие.

9 Күнәкарлармен бірге жанымды алма,

Қанішерлермен бірге өмірімді құртпа.

10 Арам қылықтары қолдарын былғайды,

Пара алып, беруден олар бас тартпайды.*25:10 Яки: Олардың оң қолдары параға толы.

11 Бірақ мен кінәратсыз таза жүремін,

Құтқаршы мені рақымыңмен Өзіңнің.

12 Тегіс жерде табан басып нық тұрамын,

Жиындарда Жаратқанға мақтау айтамын.