Забур жырлары 51

Менмен дұшпан қаралағанда Құдайға сенім арту

1 (Ән-күйдің жетекшісіне арналған Дәуіттің насихат жыры. 2 Ол едомдық Доиқтың Саулға барып, Дәуіттің Ахимәліктің үйіне кіріп-шыққаны жайлы хабар жеткізген кезіне арналған.)*51:2 Пат1 21:7; 22:9.

3 Ей, мықты жан, қылмысыңа неге мақтанасың,

Әйтсе де Құдай маған төгеді рақымын.

Ұзақты күн сен құрту жайлы ойланасың.

4 Өткір ұстарадай тіледі сенің тілің,

Өтірікті айтуға шеберсің өзің,

5 Зұлымдықты артық көресің жақсылықтан,

Алдауды да ақиқатты айтудан.

6 Ей, алдамшы тіл, сен өзгенің жанын

Жаралайтын сөзді айтуды ұнатасың!

7 Содан да Құдай сені мәңгі құртады,

Үйіңнен күшпен қуып шығарады,

Тірілер арасынан аластатады.

8 Әділдер мұны көріп қайран қалады,

Былай деп келекелейді сол арамды:

9 «Міне, Құдайды паналамаған жан,

Қайта, мол байлығын арқа тұтқан,

Зұлымдықпен одан бетер нығайған».

10 Ал мен Құдайдың киелі үйінің

Ішінде жасыл зәйтүндей өсіп-өнемін,*51:10 Зәйтүн ағаштары жүздеген жылдар бойы жасап, жұрт жемістерінен нәрлі майын сығып алады (Мыс 27:20; Ерм 11:16; Ош 14:6).

Құдайдың рақымына мәңгі сенемін.

11 Уа, Ием, Сені игі істерің үшін

Халқыңның алдында дәріптеймін,

Ізгі мейіріміңе сүйенемін.*51:11 Яки: Сені істегенің үшін дәріптеп, Өзіңе бағышталған адамдарыңның алдында ізгі есіміңе үмітімді артамын.