1 Pou Bawipaw , pawccemou asawnaw kya na thadyn?

Pawccemou vawsaw ccyh lya na reku?

2 Ccungccaw hoy leipaw nynh

lysakute a ryachipaw kha a tuaa a sah,

a paccyn hae paw thyaruhnaw kyakhe

kaangkae hae sah.

3 ccungccaw hoy leipaw tuh

a thinlung rynaw kyakhe a pookuh,

a karankuhpaw ccungccaw nynh

Bawipaw kha thyalaw zah a vua.

4 Ccungccaw hoy leipaw nynh

a lysaku keiccuze, "Pachia nynh

muih lan khyh," a ci;

a tuapaw balyn tuh, "Pachia um khyh,"

cipaw hynh nynh thua.

5 A ryalaw tuh a laan a sui pei a ua;

Pachia byapianaw kha thaethya kho khyh;

a rhaw hae kha a sarya hae.

6 A thinlung kyakhe,

"Ka shung boi lan khyh;

she takyh kya vawsawnaw

ka tung boi lan khyh," cite a tuaku.

7 A khalang tuh thyalawnaw bya,

hynbya te tuaasahnaw bya te nynh phe abia;

a lae kya rysawthyanaw te

hoyleinaw a um.✝

8 Khua kyaze rekunaw hmin kyakhe

buh zah,

a sei leipaw ccungccaw kha a chia.

Bawmtu a hoi leipaw kha aruh lante

zya a buhkhaw;

9 chindeih hawte rekunaw hmin kyakhe

ccungccaw kha a buh;

a ryachipaw kha kyng khylan a buh;

a ryachipaw kha kyng zah,

a kaang kalan a sue.

10 Tuhcite vawsaw a tungpaw tuh

a huekuh,

te bawmtu hoi leipaw tuh

a thawsaepaw keiccuze a khuliakuh.

11 A thawsaepaw nynh a thinlung kyakhe,

"Pachia nynh phe a ning vae,

a mae tuh ccanglang phe hawi vae,

e hynh kharouh muih vae lan khyh," cite a tuaku.

12 Pou Bawipaw , pou Pachia,

thoku tua lah, na kuih hangtua;

tuaasahkunaw a teing hae paw kha

ning nan hae.

13 Ccungccaw hoylei hae paw nynh

Pachia kha maeleihtawku te,

"Pachia nynh de oun tah lan khyh,"

cite pawccemou mih thinlung kya

a tuakuh cih hae?

14 Thuasalama nang nynh tuh

phe na muih! Mih vawsawnaw te

mih ngaethyanaw kha na muih zah,

bawm khylan na paccynkuh zungzae;

bawmtu hoi leipaw nynh

amaw toulou kha na kalan a pyaku;

nang tuh ngawraw bawmtu nynh na thua.

15 Ccungccaw hoy leipaw te

misei hae kuih kha khyatua;

mih hoyleinaw kha

pong na muih makhia ccungpya tua hae.

16 Bawipaw tuh zungzae te

zungzae cia siapharan nynh thua;

Pachia beik leipaw minphuin hae tuh

a ram kyate ro athua cih hae.

17 Pou Bawipaw , thinlung a nepaw nynh

a rypaw kha na thaepah cih;

mih lungthaw na saesah cih hae.

18 Ccungccaw nynh a laephi kyate

myarya ri lan umpaw kha

bua a langsaku khyh nawlan,

ngawraw te tuaasahnaw

a teing hae paw hanlan

dingnaw raepya khylan,

a siaruanaw hae kha na thaepya hae.