1 Bawipaw kha accyh takyh kya

ka thehoysah cih;

amaw thehoysahnaw kha

ka mung te po ka ho cih.

2 Ka muisaw tuh Bawipaw liate a pookuh;

zakawsangsakuh hae paw nynh

thae hae sah lah, mih lungtua sah.

3 Kamaw ryte Bawipaw kha

thehoysah oh sih lah,

a min kha pynkheihlan

hangthung oh sih.

4 Bawipaw kha ka ccung zah

yn leihru,

ka rinaw balyn kyate yn luesah.

5 Amaw kha do oh lah,

awnaw na mue cih oh;

maethyanaw kharouh na mue lan khyh oh.

6 E anyaapaw ccungccaw nynh

a siapaw roi kha Bawipaw nynh

thaepah zah,

vawsawnaw miakaw kyate a khum.

7 Bawipaw raw a rih hae paw

mih pepan khe a vaaw ccungccapaw nynh

po voilu lan umnua hae zah

minmin kha a luesah hae.

8 Bawipaw a hoynaw kha

taangtua oh lah, nytua oh;

amaw kya a rekuh hae paw tuh

lungtuapaw nynh thua hae.✝

9 Pou a mithyaa hae nanning,

Bawipaw kha rih oh,

pawccecize amaw a rih hae paw tuh

hobounaw hoi khyh hae.

10 Chindeih ano hae paw tuh

hobounaw hoi hae zah mih vuelaw,

thuasalama Bawipaw a ccung hae paw tuh

uccaw hoypaw pawpaw mah

hobou khyh hae.

11 Pou imua hae, rang oh lah,

ka bya hynh ngaetua oh;

Bawipaw rawrinaw kha

kae ccangpah cih oh.

12 Hummou hiinnaw kha ry zah,

hiinhoyte she saenaw kha a duaa?✝

13 Na lae kha hoyleinaw kyate

la sungkuh lah,

na mung kha hynbya honaw kyate

la sungkuh.

14 Hoyleinaw kha cciataw lah,

hoynaw kha raetua;

daenaw kha ccung lah, deehui tua.

15 Bawipaw nynh miding hae kha

do-oih hae zah,

a siaruanaw hae kha a ngaepya hae.

16 Bawipaw nynh hoyleinaw

a raetu hae kha rawse hae zah,

minmin liathuinaw kha laephi kyate

zosah khylan a maemih hae.

17 Miding hae nynh bawmnaw

mue khylan a sia hae ze,

Bawipaw nynh thaepah hae zah,

mih vawsawnaw balyn kyate

a luesah hae.

18 Bawipaw tuh thinlung

a koipaw kalan naekuh zah,

ngaehoinaw a hoi lei hae paw kha

a khum hae.

19 Miding tuh vawsawnaw

patae a teing,

thuasalama Bawipaw nynh

khah-e vawsawnaw balyn kyate a luesah.

20 Bawipaw nynh a ru balyn kha a do-oih;

a ru ccangkheit sanmah khya lan khyh.✝

21 Hoyleinaw nynh ccungccaw hoyleipaw hanlan

chinaw kha a thuakhaepya,

miding kha a huapaw ccungccaw tuh

detahnaw a mue cih.

22 Bawipaw nynh a ryalahtu hae

hiinnaw kha a shawkhaw hae;

amaw kya a rekuhpaw tuh

seibenaw mue lan khyh.