1 Pou Bawipaw , na kalan

saw ka sang.

2 Pou ka Pachia, nang kae doliaku;

maethyanaw yn muesah nan;

ka rhaw hae kha ka tungvaw

mih lungtuasah nan hae.

3 Nang ae ngaehoikuh hae paw tuh

maethyanaw mue nan hae sah;

akonglang um leite

lungzi lei hae paw tuh

maethyanaw mue hae sah.

4 Pou Bawipaw , na laanpi kha

yn nysah tua;

na laanpi kha yn ccangpya tua.

5 Nang tuh yn khumtu na thua zah,

anin ninlang kae ngaehoiku keiccuze

na byaccing thyhte yn cciakhae lah,

yn ccangpya tua.

6 Pou Bawipaw , langmawpi te

na langsaku vae paw

na thawccinaw te atynpaw

na sungsahnaw kha tuathui tua.

7 Ka di lya-e ka seinaw te

ka cyiseimenaw kha liathui nan vae,

Pou Bawipaw , nang tuh na hoy zah,

atynpaw na sungsahnaw liate

kae kha yn ning nan!

8 Bawipaw tuh hoy zah a ding;

tukeiccuze misei hae kha

a laanpi a ccangpya hae.

9 Zakawsangsakuh hae paw kha

laan dingpaw kya cciakhae hae zah,

zakawsangsakuh hae paw kha

a laanpi a ccangpya hae.

10 Bawipaw laanpi balyn tuh

a byakinnaw te a phunglang

a zui hae paw hanlan

atynpaw sungsahnaw te

lungzinaw nynh thua.

11 Pou Bawipaw , ka seinaw tuh

myarya alung keiccuze,

na min liate yn ngaethya.

12 Bawipaw raw a rih hae paw tuh

hum hae mou?

Minmin nynh a poku lan hae paw

laanpi kha a ccangpah cih hae.

13 Minmin tuh hiinhoyte

a um cih hae zah,

mih ccaaw hae nynh ram kha

a ccou cih hae.

14 Bawipaw te vaeccawkunaw tuh

amaw raw a rih hae paw hanlan

thua zah, a byakinnaw kha a nysah hae.

15 Bawipaw kalan khe tyty ka do,

pawccecize aning nynh ka ccu kha

kaang kyate yn luesah cih.

16 Ka kalan yn hawi lah, thaw yn ccitua,

pawccecize ka lanme zah,

vawsawnaw yn pya hae.

17 Ka lungvawsawnaw hynh

yn daesah lah,

ka lungriathaenaw kyate yn luesah tua.

18 Ka teingnaw te ka vawsawnaw hynh

yn tuapah lah,

ka seinaw balyn kha yn ngaethya.

19 Ka rhaw hae tuh hohcihmou lung hae zah,

hohcihmou yn hua hae cipaw tuatua.

20 Ka hiinnaw hynh yn rin lah,

yn khumtua;

na kya ka reku keiccuze

maethya yn lah nan.

21 Nang kha kae ngaehoiku keiccuze,

hoynaw te dingnaw nynh

yn thungkhaw vae sah.

22 Pou Pachia, Israel hae hynh

mih vawsawnaw balyn kyate

luesah tua hae.