1 Pou Bawipaw , ka bya hynh

yn ngaepya tua lah,

ka hawkhaekunaw roi hynh

yn thaepya tua.

2 Ka Siapharan te ka Pachia,

na kalan saw ka sang zah,

ka siapaw roi hynh yn ngaepya tua.

3 Pou Bawipaw , awkhua ccyh kya

ka roi kha na thae;

awkhua ccyh kya kae ngia zah

kae ngaw.

4 Pawccecize nang tuh

hoyleinaw raenaw kya

a lungrythuapaw Pachia

na thua khyh;

ahoy leipaw tuh na kya

umbua lan khyh.

5 Alysakuhpaw tuh na malang

thadyn lan khyh;

ahoy leipaw a rae hae paw kha

na hua hae.

6 Hynbya a ho hae paw kha na ro hae;

ccungccaw a theih rypaw te

ahyn-ahu hae paw kha

Bawipaw nynh na hua hae.

7 Thuasalama kae tuh atynpaw

na sungsahnaw alepaw liate

na inn lungkhu lang ka tee cih,

namaw rawrite athyaapaw

na beikinn kyakhe kae beik cih.

8 Pou Bawipaw , ka rhaw hae keiccuze

na dingnaw kyakhe yn cciakhae;

na laanpi kha ka malang

yn lawsahpya tua.

9 Ka rhaw hae khalang kya

byaccing um khyh;

mih thinlung tuh ronaw nynh thua;

mih lotharue tuh ahungkuhpaw

shaw nynh thua.

mih lae khate nawpalya lan

a lingthya hae.✝

10 Pou Pachia, mih seinaw mee kha

ingsah hae;

mih tuakunaw keiccu

khuliakuh hae sah;

mih cyiseimenaw alung keiccu thuasah,

nang ae rawse keiccu hae thuasah

minmin kha ccaring dee hae.

11 Na kya a rekuh hae paw balyn tuh

mih lungtua sah;

lungpawte hlawsah zungzae hae sah.

Na min a sungsah hae paw tuh

namaw liate mih lung atua nawlan,

minmin kha thungkhaw hae.

12 Pou Bawipaw , adingpaw kha

hythua na pya;

na thawccinaw khate

khawriaphua hawte na thungkhaw.