1 Pou Pachia, pawccemou kaening hynh

zungzae nae vua?

Pawccemou namaw kya

rampaee hae paw tuu hae kha

na thin a rianua hae?

2 Langmawlya te na poku hae paw te

na rho minphuin thua khylan

na shawkhawku hae paw

na ccungccaw a pumkuh hae paw kha

liathui hae.

Na la umnaw Zion Mua kha liathuitua.

3 Zungzae arohpaw kalan hin yn cciatua;

rhaw hae nynh beikinnthyaa kya

umpaw atyn-are kha a ro vae hae.

4 Na rhaw hae tuh na hmin thyaapaw

lungkhu khe a sia hae;

minmin syntawnawpaw kha

tuin kya a nung hae.

5 Minmin nynh palung thuakaw kya

thingphe te raekuhpaw kha

hae te a tya hae.

6 Oute thing kya asoikuhpaw balyn kha

hae te khynlyng khate marya a ro hae.

7 Na beikinnthyaa kha maee te a soi hae;

na min a umnaw hminthyaa kha

laekhu lang sawbung te

a nungsisaku hae.

8 "Minmin hynh khaleih ro lan hae,"

cite mimaw te mimaw a hoku hae;

ram kya umpaw Pachia kya-e

tungkunaw hmin balyn kha

maee te a soi hae.

9 Kaening syntawnawpaw hae kha

kae muih vae khyh;

profeh lu kheit san um vae khyh;

hohsecia ccyh aro lanpaw kha

a nyhpaw kaening laku kya

lu kheit san um khyh.

10 Pou Pachia, rhaw hae nynh

hohseciamou yn sarya cih hae?

rhaw hae nynh na min kha

zungzae a ruin a san cih hae tou?

11 Pawccemou na kuih na khin?

Pawccemou na kuih kha na by kya

na nung?

12 Tuhzemah Pachia athuapaw

ka Siapharan tuh langmawlya mawte

laephi vawlan khumnaw

rya a lahpaw nynh thua.

13 Na thungnaw te rili kha na phia zah,

tui lungkhu khe nakaa-hupi hae lu kha

na koi hae.✝

14 Levithan hupi lu kha na tude zah,

laesia ram e ccungccaw hae kha

aepaw lang na pya hae.✝

15 Tuidy te vaw taraw hae kha

na luasah hae zah,

palei aluapaw vaw hae kha

karae na rousah hae.

16 Khuadae te khuazi tuh

namaw kya-e nynh athua hae;

khuanin te sawpaw kha na rae hae.

17 Laephi adianaw ramri kha na ia;

hawnin te khuaccih kha na rae hae.

18 Pou Bawipaw , rhaw hae nynh

ae sarya hae zah,

beiknaw pawlangria lei hae paw nynh

na min a ruin a san hae paw hynh

liathuitua.

19 Na vahu a hiinnaw kha

sarepaw hae kalan pya nan;

na ccungccaw ryachi hae kha

zungzae ning nan hae.

20 Na byakinnaw kha ning nan,

pawccecize ram lungkhu

amohnaw hmin hae tuh

puathonaw te nynh phe abia.

21 Vawsaw pyakunaw a ing hae paw kha

maethyanaw muesah nan hae;

ryachi hae te minyaa hae nynh

na min kha ae thehoysah hae sah.

22 Pou Pachia, thokuh lah,

na rya kha lawtua,

beiknaw pawlangria lei hae paw nynh

anin ninlang nang

ae sarya hae paw kha

liathuitua.

23 Na rhaw hae nynh

a siarua hae paw kha ning nan,

nang ae rawse hae paw nynh

siarisiarae palei a um hae paw

roi kha ning nan.