1 Pou Pachia, ka sawsangnaw hynh

yn thaepya tua;

kae ngiakunaw hynh

beih retawkuh nan.

2 yn ngaepah lah, yn leihtua;

ka lungriathae keiccuze

myarya ka bang vae.

3 Ka rhaw hae kya-e siarisiaraepaw

roi keiccu thuasah,

ccungccaw hoylei hae paw nynh

siaruanaw keiccu thuasah

ka lungriathae.

Ka tungvaw vawsaw yn pya hae zah,

thinriate yn hua hae.

4 Ka lungkhu kya ka thinlung tuh

rinaw te phe abeih,

chi rawrinaw tuh yn thuanua vae.

5 Rinaw te thyngkunaw nynh

yn thuanua zah,

myarya lepaw rinaw nynh

phang yn bong.

6 "Vahu hawte sake ka la hoi sah lah!

Asawnaw lang ka zou cih zah,

zya ka haeung cih paw.

7 Asawnaw lang ka ccue cih zah,

ramkaw kya ka um cih;

8 khisan zawpaw te khise thopaw kyate

rekunaw hmin muihku khylan

ka rangsakuh cih," ka ci.

9 Pou Bawipaw , mih lungmuasah hae lah,

mih byaho kha tua-aesakuh hae;

pawccecize khuapi lungkhu kya

puathonaw te pekumaekunaw kha

ka muih.

10 Khua koihlukuhpaw rhawlungrua kyakhe

khuazi khuadae a cceih bungthung hae,

khuapi lungkhu khe hoyleinaw te

vawsawnaw a um;

11 khua ngaelung khe ronaw a um;

tuaasahkunaw te lingkunaw tuh

khua lungkhu e

kungkunaw hmin hae kya phe abeih.

12 Kae yn sarya hae paw hynh

ka rhaw hae thua khyh hae,

a la thua hae lanze,

ka ngaesang kho cih;

kae yn lysanuakuh hae paw hynh

yn rhawtu hae paw thua khyh,

a la thua hae ze, ka retawkuh kho cih hae.

13 Thuasalama tuhte a cyihtupaw tuh

nang na thua zah,

kae te phe ah lokuhpaw, ka banpaw,

kae ccawkuhpaw ka ruiban nynh na thua.

14 Lungtuate bya hoypaw kha

ah hokuh oh zah,

zapi hae ryte Pachia inn lang

pynkheihlan ah cceih oh.

15 Chinaw nynh mih tungvaw

thuanua hae sah;

mih hiin pite Michi khua lang

cceih hae sah;

pawccecize hoyleinaw tuh

mih inn kya te mih thinlung kya a um.

16 Kae tuh Pachia kha ka ko zah,

Bawipaw nynh yn khum cih.

17 Zete, awkhua te ninthu ccyh khe

bokhaekute ka hawkhaekuh zah,

ka roi kha yn thaepah cih.

18 Rhaw ka tuknaw kyate

vaemaw mue leite

kae kha yn shawkhaw cih,

pawccecize ccungccaw patae tuh

kae kha rawsete a um hae.

19 Langmawlya mawte bawitungkhung kya

a haungpaw Pachia nynh a thae cih zah,

minmin kha zakaw a sangsah cih hae,

a paleihku khyh keiccu hae ze,

Pachia kha rih khyh hae.

20 Ka banpaw nynh a banpaw kha

a kuih hangnua zah,

amaw byakin kha zui khyh,

21 a bya tuh thawpah laeze

anaw lante hothya salamah,

rhawtukku rynaw thinlung a hoi;

a bya tuh chitui laeze nehua salamah,

poh thuaakuhpaw thaloi nynh thua.

22 Na phupaw kha

Bawipaw kya nung lah,

nang kha ae bawm cih;

miding kha shungnaw

kharouh pya boi lan khyh.

23 Thuasalama, pou Pachia,

minmin kha akhu huaccepaw

hunghua lungkhu lang

na sahbung cih hae;

ccungccaw theih hae paw te mihyn hae tuh

mih hiinshe angankuh cia hiin lan khyh hae.

Thuasalama kae tuh nang kha

kae doliakuh cih.