1 Josef phin kha tuuphu hawte

a cciakhaepaw,

Pou Israel Tuurintu,

beih yn ngaepya tua!

Cherubim vawlan

bawitungkhung kya a haungpaw,✝

2 Efraim, Benjamin te

Manasseh phin hae malang khe

na thawzung kha langsakute,

kaening khum khylan

oun thuatua!

3 Pou Pachia, kaening hynh

langmawlya hawte

oun thuasah thui tua;

khumnaw kae mue nawlan,

na mitmae kha awsah tua.

4 Pou Bawipaw vaaw Pachia,

na ccungccaw hae sawsangnaw kya

hohseciamou na thinria ung cih?

5 Minmin kha mitphi sanlou

na dang hae zah,

nia lanpaw mitphi kha mah

phe beih lan na pya vae hae.

6 Kaening hynh kae innpaw hae nynh

saryapaw lang nae rae zah,

kae rhaw hae nynh oun nuinse hae.

7 Pou vaaw Bawipaw Pachia,

kaening hynh langmawlya hawte

oun thuasah thui tua,

khumnaw kae mue nawlan,

na mitmae kha awsah tua.

8 Izip ram kyate misu ku kukheit kha

na cciakhae zah,

ccangpaw minphuin hae kha

na dee kou hae te, tuh-e misu ku tuh na lin.

9 Tuh-e misu ku hanlan laephi kha

na cciccaepya;

a tharui saw zah,

ram lungkhu phe abeih.

10 A mynlyh nynh mua hae kha

khaw hae zah,

a karan hae nynh sidar ku pipi hae kha

pong a bong hae;

11 a karan hae tuh rili kyacia lo hae zah,

a toihthaw hae paw tuh

Vawpi kyacia phe a thua.

12 Te laanpi po a cceih hae paw nynh

a thae kha a loku ccaw hae cite,

pawccemou a tureih kha na ropya?

13 Nge nynh tuh-e aku tuh roh zah,

loramsaw hae nynh a ae hae.

14 Pou vaaw Pachia, yn maeleihku tua;

vaawlang te dobung lah muihtua;

e misu ku hynh do-oihtua,

15 na ranglang kuih te na linpaw

misu ku taraw hynh do-oihtua.

16 Rhaw hae nynh maee te u hae zah,

a nge vae hae;

thinrianaw maesue te

na thuiheinaw hae kyakhe roh hae sah.

17 Thuasalama na ranglang kuih kya

a umpaw ccungccaw,

namaw elang a thaw na saesahpaw

ccungccaw tungvaw khe

na kuih kha khangtua.

18 Tetuh namaw kyate nulang

kharouh kae maeleihkuh vae lan khyh;

hiinnaw oun pya lah,

na min kae thehoysah cih.

19 Pou Bawipaw vaaw Pachia,

khumnaw kae mue nawlan,

na mitmae kha awsah tua.