1 Laephi te a lungkhu umpaw balyn tuh

Bawipaw kya-e nynh thua,

laephi te a vawlan a hiin hae paw balyn hynh

amaw kya-e nynh thua,

2 pawccecize laephi kha

rili vawlan khe thadynsah zah,

aleihpaw kha tui hae vawlan khe

a tynsah.✝

3 Hummou Bawipaw mua vawlan

a kae cih?

Hummou amaw kya-e athyaapaw hmin kya

a thadyn cih?

4 A kuih te a thinlung a thyaapaw,

zohtuh a beik leipaw te

hynhute bya a kinkuh leipaw nynh

a kae cih zah a thadyn cih.✝

5 Aning nynh Bawipaw kyate

hythuanaw kha thuasah,

a khumtupaw Pachia kyate dingnaw kha

thuasah a mue cih.

6 Tuhcihawpaw ccungccaw tuh

Pachia a ccungpaw phu,

Jakob Pachia mae kha

a ccungpaw nynh thua.

7 Pou koikua hae, hungkuh oh!

Pou zungzae a umpaw thuakaw hae,

hungkuh oh!

aphu-epaw Siapharan yn tee cih.

8 A phu-epaw Siapharan tuh hummou?

A thawsaepaw te a thungpaw Bawipaw ,

rhawtuknaw kya athungpaw

Bawipaw nynh thua.

9 Pou koikua hae, hungkuh oh!

Pou zungzae a umpaw

thuakaw hae, hungkuh oh!

aphu-epaw Siapharan yn tee cih.

10 A phu-epaw Siapharan tuh hummou?

Aning tuh vaaw Bawipaw ,

a phu-epaw Siapharan nynh thua.