1 Bawipaw kha lungsaete ka ngaw;

yn ngaepah zah ka siapaw kha

yn thaepya.

2 Ri lan umpaw akhupaw lungkhu te thuasah,

tuiccua lungkhu te thuasah

kae kha poh yn thuaa,

ka ccu kha lungpi vawlan khe

yn khang zah,

ka ccianaw kha yn khynsahpya.

3 Ah Pachia thehoysahnaw hlaw,

hlaw thawpaw kha yn sahsah.

Ccungccaw patae nynh muihte

a rih cih hae zah,

Bawipaw kha a doliakuh cih hae.

4 Lysakunaw kalan maeleihkuh khyh zah,

ahme leipaw pachia kalan cciasei leite,

Bawipaw kha a doliakuhpaw tuh

lungtuapaw nynh thua.

5 Pou Bawipaw ka Pachia,

kaening hanlan ngaeang lan umpaw

na ryalaw hae te

na khuakhannaw hae tuh

myarya alung vae;

nang te khinkhia lanpaw

hum sanmah um khyh.

tuh-e balyn tuh ka ho ka ria lanze,

hotae riatae um lan khyh.

6 Silawnaw te silawnaw uccaw kha

na rypaw thua khyh,

ka nakaring kha nae uasah vae.

Maee-ute silawnaw te seishawnaw

silawnaw kha nae ngiapaw thua khyh.✝

7 Tetuh kae nynh, "E kya mang ka um;

ccauh akuekuhpaw kya ka hanlan

na zeipaw mang a um.

8 Pou ka Pachia, na rynaw rae tuh

ka lungrythuakhaekuh;

na ccangpyanaw tuh ka thinlung kya

a um," cite kae khung.

9 Zapi pumkunaw kyakhe

nae luesahnaw thehoypaw kha

ka ho vae;

Pou Bawipaw , tuh-e hopaw tuh

ka umtaw lan khyh cipaw na ny.

10 Nae khum zah nae bawmnaw kha

ka thinlung kya ka thuruh khyh,

Na lungzinaw te na khumnaw kha

ka ho vae;

atynpaw na sungsahnaw te

na lungzinaw kha

zapi pumkunaw kya ka phei khyh.

11 Pou Bawipaw , na thawccinaw kha

yn kang nan;

atynpaw na sungsahnaw te

na lungzinaw nynh

zungzae yn khynsah sah.

12 Pawccecize riatae um leipaw

hoyleinaw nynh phang yn koihlu;

ngaw ka muih kho lei lan ciate

ka seinaw nynh phe yn phya vae;

ka sangrua laeze lung zah,

ka lungthaw phe azya.

13 Pou Bawipaw , kae kha

beih yn luesah rytua;

Pou Bawipaw , arangte

beih yn bawmtua.

14 Kae kha chia lan

yn paccynnuakuh hae paw balyn tuh

maethyanaw mue hae sah lah,

mih lungmua sah.

vawsaw yn tungsah ry hae paw tuh

mih nulang maekuh hae sah lah,

thethyanaw mue hae sah.

15 "Alei, Alei!" cite yn sarya hae paw tuh

mih maethya keiccuze siikuh hae sah.

16 Thuasalama nang ae

ccung hae paw balyn tuh

namaw kya mih lungtua sah lah,

mih lungpaw sah.

Na khumnaw a ry hae paw nynh,

"Bawipaw tuh alesae!"

cite palei ho hae sah.

17 Kae tuh a ryachipaw te

anyaapaw nynh ka thua,

thuasalama Bawipaw nynh

yn ning khyh.

Nang tuh yn bawmtu te

yn luesahtu nynh na thua,

Pou ka Pachia, na thysung nan sah.