1 Pou Pachia, nang tuh ka Pachia nynh

na thua, nang kha kae ccung,

tui a um leinaw laerou kya hawte,

ka muisaw nynh nang kha

tui lang ae haw;

ka pynsaw nynh nang kha ae ngae.

2 Na huhan te na phu-enaw kha

muih khylan beikinnthyaa kyakhe

nang kha kae beik vae.

3 Atynpaw na sungsahnaw tuh

hiinnaw laeze ahoyhua keiccuze

ka munglae nynh nang kha

ae thehoysah cih.

4 Tuhcite ka hiin lungkhu balyn

nang kha kae thehoysah cih,

ka kuih ka hang cih zah

na min kha kae ko cih.

5,6 Ka ikhung vawlan khe

namaw konglang ka tua zah,

nang kha khuazi he kae tuathui te,

loohdangkunaw kya vueso hawte,

ka muisaw tuh a vueso cih zah,

alungtuapaw ka munglae nynh

nang kha ae thehoysah cih;

7 pawccecize nang tuh yn bawmtu

na thua vae zah,

na sake mynlyh kyakhe

lungtuanaw hlaw ka sah.

8 Ka muisaw tuh

namaw kya beekuh zah,

na ranglang kuih nynh kae kha

yn thungkhaw.

9 Thuasalama ka hiinnaw ro khylan

yn ccung hae paw tuh

lae kaw lang a rungbung cih hae;

10 minmin tuh thaloi te

chia athua cih hae zah,

suizaw hae looh athua cih hae.

11 Thuasalama siapharan tuh Pachia kya

a lungpaw cih;

Pachia min te bya a kinkuh hae paw tuh

mih lungtua cih,

pawccecize mihyn hae khalang tuh

myhsah athua cih.