1 Pou Bawipaw , hoyleinaw

a rae hae paw kyate

beih yn luesah;

a puatho hae paw kyate

yn thungkhawtua,

2 mih thinlung kya

ahoy leipaw kha paccyn hae zah

rhawtuknaw kha

palei a puisah hae.

3 Mih lae kha hupaw lae hawte

hesah hae zah,

mih munglae kyakhe

huparepaw sy a um.✝

4 Pou Bawipaw ,

ccungccaw hoylei hae paw kyate

phang yn rintua;

kae kha khulia khylan

yn paccynnuakuh hae paw,

a puatho hae paw kyate

yn thungkhawtua.

5 A lysakuh hae paw nynh

kaang yn syakhaw hae,

arui khate miaa kha

yn zokhaw hae zah,

laanpi kyakhe

kaang po yn syakhaw hae.

6 Bawipaw kalan khe,

"Nang tuh ka Pachia nynh na thua;

Pou Bawipaw ,

kae ngianaw roi hynh

yn thaepya tua," cite ka hopya.

7 Pou Bawipaw ,

a thungpaw yn luesahtu ka Bawipaw,

rhawtuk nin khe

ka lu kha nae bong vae.

8 Pou Bawipaw , ccungccaw hoylei

hae paw rynaw kha

ua nan hae; ahoy leipaw

mih paccynkunaw kha

ccingsahpah nan hae.

9 Kae yn koihlu hae paw nynh

mih lu kha a hangthung hae;

mih munglae a hoyleinaw kha nynh

mimaw kha phang bong hae sah!

10 Zaezae epaw maee-e nynh

mih tungvaw ccawphu hae sah!

hunghua lungkhu langkhe,

pou kho lei lante

ccaring vua thua hae sah!

11 Mihyn hae kha ram lungkhu kya

tynsah nan hae;

hoyleinaw nynh a puatho hae paw kha

arangte roh hae sah!

12 Bawipaw nynh a hoboupaw kha

pankhaw zah, a ryachipaw hanlan

hmerarih lan a cyipya cipaw kha ka ny.

13 Miding hae nynh na min kha

ae thehoysah ccaccing cih hae;

miding tuh na umnaw kyakhe a um cih.