1 Ryachi hae hanlan a tua a roihpaw tuh

lungtuapaw nynh thua,

a vawsaw ccyh lya

Bawipaw nynh a luesah cih.

2 Bawipaw nynh a thungkhaw cih zah,

a hiinnaw kha a khynsah cih;

ram lungkhu kya lungtuate a umsah cih.

Aning kha a rhaw hae rynaw kalan

na ap lan khyh.

3 Dan khyh zah a hueku lyakhe

Bawipaw nynh a bawm cih;

a ccinaw kyate bua a dansah cih.

4 Kae nynh, "Pou Bawipaw ,

na tungvaw ka sei vae keiccuze

thaw beih yn ccih lah, yn dansah," ka ci.

5 "Hohtuh vema a chih cih zah

a min azo cih?" cite

ka rhaw hae nynh mih eiung zah

a hoku hae.

6 Kae kha muih khylan he yn ccia hae ze,

accakaepaw bya kha ho hae zah,

mih thinlung kya hoyleinaw kha

a ccakhungku hae;

he a pou hae te, tuh-e tuh teitei kya

balyn a ho hae.

7 Kae yn hua hae paw balyn nynh

ka konglang byaru a hoku hae;

ka hanlan ahoy leipaw kha

a paccyn hae.

8 A chisah khopaw uccaw tuh

a tungvaw phang bekuh vae zah,

a huekunaw kyate bua thokuh vae lan

khyh cite a tua hae.

9 Ka doliakupaw, ka looh a aepaw

ka ban hoypaw nynh heize,

kae kha rawsete a ccu yn hangnua vae.✝

10 Pou Bawipaw , minmin kha

ka liaru kho nawlan hae,

thaw yn ccih lah, yn thosahku tua.

11 Tuhcite ka rhaw nynh

yn tae khyh keiccuze,

ka tungvaw na lungrythua cipaw ka ny.

12 Ka ccingnaw keiccuze nae bawm zah,

na kya zungzae nae umsah vae.

13 Bawipaw , Israel Pachia kha

zungzae te zungzae cia

thehoysah oh sih. Amen, Amen.✝