1 Pou Pachia, langmawlya

kae minpaaw hae she kya

na la cyipaw kha

minmin nynh yn hopah hae zah,

kae nakaring te phe kae thae vae:

2 minphuin hae kha na kuih te

na dee hae zah,

na ccungccaw hae kha na umsah hae;

ccangpaw minphuin hae kha

vawsaw na pya hae zah,

na ccungccaw hae kha na luesah hae;

3 mih thaloi liate ram kha tae khyh hae,

mih kuih nynh taenaw pya khyh hae;

mih tungvaw na lungrythua keiccuze,

na ranglang kuih te na mitmae

awnaw liate ram kha a tae hae.

4 Nang tuh ka Siapharan te

ka Pachia nynh na thua;

nang nynh Jakob phuin kha

taenaw na pya.

5 Namaw liate kae rhaw hae kha

kae khulia hae;

na min liate kae rhaw hae kha

kae syde hae.

6 Ka li kha ka doliakuh khyh zah,

ka thaloi nynh mah yn khum kho khyh.

7 Thuasalama kae rhaw hae kyate

nae khum vae zah,

kaening oun hua hae paw kha

mih mae na thyasah vae hae.

8 Kaening tuh Pachia kya

palei kae pookuh zah,

na min kha zungzae kae thehoysah cih.

9 Thuasalama kaening kha

phe nae vua vae zah,

maethya nae law vae,

kae rhawkaw hae kya

na cceihbua vae khyh.

10 Kaening kha rhaw hae malang khe

nae ccuesah zah,

kae rhaw hae nynh

uccaw oun luade vae hae.

11 Kaening kha chia lanpaw tuu hawte

nae nungde vae zah,

minphuin ccangpaw hae laku kya

phiariphiarae nae nung.

12 Na ccungccaw hae kha

amee beihtaraw lan nae zua zah,

tuh-e amee tuhte amia na muelae khyh.

13 Kaening kha kae innpaw hae nynh

a sarya hae paw lang nae rae zah,

kae pepan um hae paw nynh

a theihrya hae paw te

a nuinse hae paw lang nae rae.

14 Minphuin hae laku kya

theihryapaw minphuin lang

nae rae zah,

ccungccaw hae laku kya saryate

nuinsepaw lang nae rae vae.

15,16 Saryatu hae te thethyasahtu hae bya

keiccu thuasah,

rhaw te liarutu hae mitmae keiccu thuasah

kae tuh thethyanaw palei ka mue zah,

maethyanaw nynh ka mae phang yn bong.

17 E hae balyn tuh kae tungvaw

a thua ccaw zemah,

kaening nynh nang kha kae ning khyh zah,

na byakinnaw kha kae roh khyh.

18 Kae thinlung tuh nulang sihkuh khyh,

kae ccianaw tuh na laanpi kyate

maekuh khyh,

19 tuhzemah suizaw hae umnaw kyakhe

kaening kha nae khya zah,

marae zipaw mohnaw te

phang nae bong.

20 Kae Pachia min kha kae ning zah,

ccangpaw pachia kalan khe

kae kuih kae daw lanze,

21 tuh-e tuh Pachia nynh

langsakuh lan khyh tou?

Pawccecize Pachia nynh thinlung kya

thuruhpaw kha a ny.

22 Nang keiccuze kaening tuh

anin ninlang oun theih hae zah,

chia lanpaw tuu lang nynh oun ria hae.✝

23 Pou Bawipaw , thoku tua!

Pawcce na i?

Thaekuh ccavae, kaening hynh

zungzae yn vua nan!

24 Pawcce na mae nae retawku?

Kae teingnaw te oun tuaasahnaw hae hynh

pawcce na ning?

25 Laenoi te nae kalouh vae;

kae pyn tuh laephi kya phang bekuh vae.

26 Tho lah oun bawmtua.

Atynpaw na sungsahnaw liate

oun shawkhawtua.