1 Bawipaw tuh siapharan nynh thua!

Laephi tuh a lungtua sah;

tuikoih patae mah mih lungtua sah!

2 Maeking te marae zipingpaw

mohnaw hae tuh amaw pe khe

po voilu lan a um hae;

dingnaw te byading tuh

a bawitungkhung atynnaw nynh thua hae.

3 Maee tuh amaw malang khe cceih zah,

po voilu lan a umpaw

a rhaw hae kha a u hae.

4 A khozaw nynh laephipi kha a ak;

laephi nynh muih zah a thyngkuh.

5 Bawipaw malang khe,

laephi pynpi a ukpaw

Bawipaw malang khe mua hae tuh

khoilung hawte atui hae.

6 Vaawlui nynh a dingnaw kong kha ho zah,

ccungccaw hae balyn nynh a phu-enaw kha

a muih hae.

7 Raepaw zohtuh a beikpaw balyn kha

maethya a law hae,

ccungkia leipaw zohtuh liate

a pookuh hae paw pachia hae balyn tuh

amaw malang khe a bakhung hae.

8 Pou Pachia, na byapianaw liate

Zion khuaccaaw hae nynh

thae hae zah mih lungtua,

Judah ram e khua hae mah mih lungtua.

9 Pou Bawipaw , nang tuh

laephi pynpi kya

ahang huaccepaw nynh na thua;

ccangpaw pachia hae balyn laeze

myarya hangthung na thua.

10 Bawipaw nynh hoyleipaw

a hua hae paw kha a sungsah hae;

alungzipaw a ccungccaw hae

hiinnaw kha a rin hae;

minmin kha ccungccaw hoylei

hae paw kuih kyate a luesah hae.

11 Awnaw tuh miding hae hanlan

aw zah, lungtuanaw tuh

thinlung ading hae paw hanlan a aw.

12 Pou miding hae nanning,

Bawipaw kya nae lungtua sah lah,

a min thyaapaw kha thehoysah oh!