1 Pou Pachia, Zion kya

kae thehoysah cih;

na kalan bya kae kinkupaw kha

kae ccingsah cih,

2 sawsangnaw a leihtupaw Pachia!

Ccungccaw balyn tuh na kalan

oun thua cih hae.

3 Ahoy leipaw cyisahnaw nynh

kaening kha he oun tae tuh,

kae cyiseimenaw kha nae ngaethya.

4 Na voidu lungkhu um khylan

na po hae zah, na naesaku hae paw

ccungccaw hae tuh

lungtua hae paw nynh thua.

Athyaapaw na beikinn athuapaw

na inn kya-e ahoypaw

uccaw khate phe kae byn cih.

5 Pou oun khumtupaw Pachia,

ri lan umpaw cyisahnaw te

kaening kha nae leih zah nae luesah;

nang tuh laephi adianaw balyn kya te

asaw huanaw rili kin kya um hae paw

mih ngaehoinaw nynh na thua.

6 Na thawzung te mua hae kha

na tynsah hae; tuhcite nang tuh

thungnaw te phe na beih.

7 Rili a ccaepaw roi,

tuileih a ccaepaw roi te

ccungccaw hae nynh

a siaruanaw hae kha na daesah.

8 Laephi asaw huanaw kya um hae paw tuh

na muihsahnaw hae keiccuze a rih hae;

khuanin athuanaw kya te a ccawnaw kya

lungtuate na siasah hae.

9 Laephi kha na do-oih zah

khuaa na rawsahpya,

myarya na hoirumsah;

Pachia vawkhu tuh tui te phe abeih;

ccungccaw hae kha looh te

na bawm hae,

tuh-e tuh na paccynpaw nynh thua.

10 Athuekuh vae paw leikua kyakhe

khuaa patae na rawsah,

leikua kha na nginsah,

laephi kha khuaatui te na nesah zah,

apopaw ccacii kha hythua na pya.

11 Na hoynaw khate kum kha

looh na voisah;

na ccianaw miakaw kya

looh patae a um.

12 Sahiin rampaeenaw patae a um,

mua hae tuh lungtuanaw te

phe abeih hae.

13 Ramnonaw miakaw kya tuu hae,

miaa hae te phe abeih,

abuenaw kyakhe ccathae te phe abeih,

lungtuate sia hae zah

pynkheihlan hlaw a sah hae.