1 Pou Pachia, vawsawnaw ka tung lya,

ka sawsangnaw hynh yn thaepya tua;

ri lan umpaw rhaw hae kyate

ka hiinnaw hynh yn khynsah tua.

2 Ccungccaw hoylei hae paw nynh

aruh lante khuakhankunaw hae kyate thuasah,

hoyleinaw a rae hae paw

paccynkunaw kyate thuasah

yn thuruhtua.

3 tuh-e hae tuh mih lae kha

thaloi hawte a taw hae,

bya khahpaw kha the hawte

a kawnaw ry hae,

4 A buhkhawnaw hae kyate

ccaenaw a um leipaw kha a kaw hae;

ri leite palou a kaw hae.

5 Ahoy leipaw mih eenaw kha

tynkaring lan a kyngku hae;

aruh lante kaang syakhawnaw kong kha

hokuh hae zah,

"Hum nynh mou aening hynh oun muih?

6 Hoyleinaw ah rae oh paw hynh

hum nynh mou oun nyh kho cih?

Athyaruhpaw paccynkunaw khua kha

phe ah khan vae oh," a ciku hae.

Pawccecize ccungccaw thinlung te

tuakunaw tuh kou akhu.

7 Thuasalama Pachia nynh a the te

minmin kha a kaw cih hae zah,

vaemaw palou a mue cih hae.

8 Mih lae nynh mimaw kha ronaw kalan

a cciakhae cih hae;

minmin kha a muih hae paw balyn tuh

rinaw te a thyngkuh cih hae.

9 Tetuh ccungccaw miakaw a rih cih hae;

Pachia nynh a cyipaw kong kha

minmin nynh a ho cih hae zah,

a cyipaw kha a tua cih hae.

10 Miding hae tuh Bawipaw kya

mih lungtua sah lah,

amaw kya rekuh hae sah.

Miding balyn nynh mih thinlung te

thehoysah hae sah.