1 Pou Pachia, na byading kha

siapharan kalan pya lah,

na dingnaw kha

siapharan ccapaw kalan pyatua.

2 Aning nynh na ccungccaw hae kha

dingnaw te byapia hae sah lah,

na kya-e ryachi hae kha byading te

byapia hae sah.

3 Mua hae nynh ccungccaw hae hanlan

hoirumnaw thuakhae hae sah lah,

sangpyng hae nynh dingnaw kha

thuakhae hae sah.

4 Tuh-e siapharan nynh

ccungccaw hae kyaze

ryachi hae kha thungkhaw hae sah lah,

ahobou hae paw kha luenaw pya hae sah,

te vawsaw pyatu hae kha tae hae sah.

5 Khuanin te sawpaw atyn lungkhu balyn,

she takyh kya minmin nynh

nang kha ae rih hae sah.

6 Tuh-e siapharan tuh aw kou takawpaw

lonua vawlan accahpaw

khuaa hawte thua sah lah,

laephi a ciasahpaw khuaa hawte thua vae sah.

7 A she lungkhu kya dingnaw tuh

lethung sah lah,

sawpaw a zo makhia daenaw um sah.

8 Rili ccangkheit kyate ccangkheit kyacia

uk sah lah,

Zufrates vawpi kyate

laephi adianaw cia uk sah.✝

9 Laesia ram um hae paw nynh

a malang khe bakhung hae sah lah,

a rhaw hae nynh laenoi kha lya hae sah.

10 Tarshish siapharan hae te tuikoih

siapharan hae nynh

ngunto pya hae sah lah,

Sheba te Seba siapharan hae nynh

lasung ccyngpah hae sah.

11 Siapharan balyn nynh a malang

bakhung hae sah lah,

minphuin balyn nynh amaw rya kha

lawpah hae sah.

12 Pawccecize ahobou hae paw nynh

amaw kha a ko hae ze luesah hae zah,

ryachi hae te bawmtu hoi lei hae paw kha

a luesah hae.

13 Ryachi hae te minyaa hae kha

thawccih hae zah,

minyaa hae hiinnaw kha a khum hae.

14 Tuaasahnaw te puathonaw kyate

mih hiinnaw kha a shawkhaw hae;

mih chii tuh amaw muihnaw kya aphute.

15 Siapharan tuh a she sae vae sah!

Sheba sui kha amaw kalan

pya vae hae sah.

Amaw elang zungzae

sawsangpah hae sah lah,

Nin takyh hythuapya hae sah.

16 Ram lungkhu kya looh patae um sah;

a ccathae tuh Lebanon mua hae kya-e hawte

mua dung hae vawlan khe luiluih hy sah;

khuapi kya-e ccungccaw hae tuh

loo kya-e lonua hae hawte

khuapi kyakhe apaw paw hae sah.

17 A min tuh zungzae tyn sah lah,

a minthaannaw tuh khuanin a um

lungkhu balyn po tyn sah.

Minphuin balyn tuh amaw liate

hythuaccou hae sah;

aning tuh hythua ccoupaw nynh

thua cite minmin nynh ho hae sah.

18 Israel Pachia Bawipaw tuh

thehoysah oh,

aning kyalya nynh ngaeangthua lan

umpaw uccaw hae kha a rae.

19 A phu-epaw a min kha zungzae

thehoysah oh; a phu-enaw tuh

laephi pynpi phe beih sah.

Amen, Amen.

20 Jesse ccapaw David sawsangnaw athang vae.