1 Pou Bawipaw , kae thehoysah cih,

pawccecize nae khum vae zah,

ka rhaw hae kha kae ka keiccuze

mih lung na tuasah khyh hae.

2 Pou Bawipaw ka Pachia,

na kalan bawmnaw ngiakute

ka sia zah,

kae kha nae dansah vae.

3 Pou Bawipaw , ka muisaw kha

michi khua kyate na lawthung,

Hunghua lungkhu lang

a rungbung hae paw kyate

hiinnaw kha bua nae pya.

4 Pou alungzipaw a mithyaa hae nanning,

Bawipaw kha thehoysahnaw

hlawsahpah oh,

athyaapaw a min kha thehoysah oh.

5 A thinrianaw tuh

sosoh kyalya nynh thua,

a hoynaw tuh shemazi hanlan nynh thua.

Khuazi kya rawkhuinaw um salamah,

awkhua kya vae tuh lungtuanaw yn thua.

6 Hoynaw ka mue lya tuh,

"Yn tae boi lan khyh hae," ka ci.

7 Pou Bawipaw , na hoynaw liate,

tynkaringpaw mua hawte

kae kha nae tynsah vae.

na mitmae nae retawku vae ze,

rinaw te phe ka beih.

8 Pou Bawipaw , na kalan ka sia zah,

bawmnaw kae ngiaku:

9 Ka chih zah shawku langkhe

hung ka ccia lanze,

pawmou thanenaw a um?

Laenoi nynh nang kha

ae thehoysah cih tou?

Na lungzinaw kong kha a ho cih tou?

10 Pou Bawipaw , ka bya yn thaepah lah,

thaw beih yn ccih!

Pou Bawipaw , kae yn bawmtu thuatua!

11 Ka raw ka khuinaw kha

lawnaw lang nae paleihpya vae;

ka raw ka khuinawpaw buriboei kha

nae khahpah zah,

lungtuanaw boei kha nae zingsaku.

12 Tetuh ka muisaw tuh daebabi lan

um lan khyh zah,

nang kha ae thehoysah cih.

Pou Bawipaw ka Pachia,

nang kha zungzae kae thehoysah cih.