1 Ka muisaw nynh Pachia rou kha

daebabi lan a ngaehoi;

ka khumnaw tuh amaw kyate nynh yn thua.

2 Pachia rou hynh nynh ka lungpi,

ka khumnaw te ka khynnaw athua;

kae tuh yn piasah kho lan khyh hae.

3 Nanning nynh hohseciamou

lu kheitpaw kha na rawse ung cih oh?

Vyavya pupaw lungrua,

vyavya khuliakuhpaw tureih hawte

athuapaw amaw kha

nae balyn te hohseciamou

na rawse cih oh?

4 Tuh-e paw kha phu-e a ccounaw kyate

sawbung lan a paccynku hae.

Minmin tuh hynbya kyakhe

mih lungrythua;

mih khalang te hythuapya hae salamah

mih lungkhu kyate thya a law hae.

5 Ka muisaw nynh Pachia rou kha

daebabi lan a ngaehoi,

pawccecize ka ngaehoinaw tuh

amaw kya rou nynh a um.

6 Amaw rou hynh nynh ka lungpi,

ka khumnaw te ka khynnaw athua;

kae tuh yn piasah kho lan khyh hae.

7 Ka luenaw te ka sung-enaw tuh

Pachia kya nynh a um;

athungpaw ka lungpi,

ka khynnaw tuh Pachia nynh thua.

8 Pou ccungccaw hae, Pachia kha

doliakuh zungzae oh;

nae thinlung kha amaw malang khe

hungpah oh;

Pachia tuh aening khynnaw nynh thua.

9 Anyaapaw ccungccaw hae tuh

ccungkia leipaw nynh thua hae,

aly-asaepaw ccungccaw hae tuh

a hynhupaw nynh thua hae;

akhin sae lan hae ze,

zawbahaepaw nynh thua hae;

minmin tuh hy laeze a zawhua hae.

10 Puathonaw kha doliakuh nan oh,

Luadenaw kha ngaehoikuh nan oh;

a hoirum hae paw nynh

a hoithung hae ze doliakuh nan hae.

11 Pachia nynh vaekheit a ho vae;

vaeningnaw ho zah ka thaepaw tuh:

huhan tuh Pachia kya-e nynh thua,

12 Pou Bawipaw , atynpaw

sungsahnaw tuh na kya-e nynh thua.

Ccungccaw balyn kha

mih ryalawnaw thyhte na pyaru hae.✝