1 Pou Pachia, yccae leite beih um nan;

Pou Pachia, daebabi lan beih um nan!

2 Na rhaw hae tuh atu heize

siarisiarae a um hae;

nang ae hua hae paw nynh mih lu kha

a hangthung vae hae.

3 Na ccungccaw hae kha rawsete

aruh lante khua a khannuaku hae;

na thungkhawpaw ccungccaw hae kha

rawsete pynkheihlan

a paccynnuaku hae.

4 Minmin nynh, "Rang oh,

mih minphuin khuh maemih oh sih;

Israel min kha liathui thua lae

nan vae sah," a ciku hae.

5 Minmin nynh lunglokute

khua a khanku hae;

nang kha rawsete

byakinkunaw a rae hae;

6 tuh-e hae tuh: Edom ccungccaw hae,

Ishmael ccungccaw hae;

Moab ccungccaw hae,

Hagri ccungccaw hae,

7 Gebal ccungccaw hae,

Ammon ccungccaw hae,

Amalek ccungccaw hae,

Filistin ccungccaw hae te

Tair ccungccaw hae nynh thua hae;

8 Assiria ccungccaw hae mah

minmin kalan a panbua hae;

Minmin tuh Lot ccaaw hae kya-e

athungpaw thawzung nynh thua hae.

9 Midian ccungccaw hae tungvaw thuasah,

Kishon Vawkhu kya-e Sisera te

Jabin tungvaw thuasah

na cyi hae hawte hynh-e hae hynh cyih hae,✝

10 Sisera te Jabin tuh Endor kya

na roh hae zah, mih rhua tuh

laephi kya vaetua ia hawte phe thua hae.

11 Oreb te Zeeb tungvaw na cyi hawkhate

mih bawi hae balyn kha cyih hae,

mih siapharan hae kha mah Zebah te

Zalmunna hawkhate cyih hae.✝

12 Zebah te Zalmunna tuh, "Pachia ram kha

ahmaw ram lang tangsah oh sih,"

cite a ho hae paw nynh thua hae.

13 Pou ka Pachia, minmin kha

khiccung nynh a mungpaw vuiping lang

tangsah hae lah, khisan nynh

a mungpaw vaekang lang tangsah hae.

14 Maee nynh loram a u hawte thuasah,

maeesoi nynh mua a u hawte thuasah,

15 minmin kha khise te dee hae lah,

na khisepi te sii hae.

16 Pou Bawipaw , minmin nynh

namaw min a ccung ccaw hae,

mih maethyasah hae.

17 Maethyanaw mue hae sah lah,

zungzae mih lungroh sah;

thethyate chih hae sah.

18 Na min Bawipaw na cikuhpaw

nang rou hynh nynh

laephi pynpi kya Ahang Huaccepaw na thua

cipaw nyh hae sah.