1 Pachia tuh aening khynnaw te

thawzung nynh thua,

vawsaw ccyh lya zungzae

oun bawmtu nynh thua.

2 Tukeiccuze laephi tuh nuekuh zah,

mua hae tuh hy hae zah

rili lungkhu lang a ccaw hae zemah

kae rih lan khyh;

3 rili tuh tuileih thote aroi ccae zah

a thyhleihku zemah,

mua hae tuh a hy hae zemah,

kae rih lan khyh.

4 Ahang Huaccepaw kya-e

athyaapaw umnaw,

Pachia khualipi kha

a lungtuasahpaw vawpi vakheit a um.

5 Pachia tuh tuh-e khuapi lungkhu um zah,

tuh-e tuh roh vae lan khyh;

Pachia nynh tuh-e khuapi tuh

awkhua takaw te a bawm cih.

6 Minphuin hae tuh siarisiarae a um hae,

peenaw hae tuh a hy hae;

A roisaw zah laephi tuh

tui lang a tang.

7 Vaaw Bawipaw tuh

aening kya a um;

Jakob Pachia tuh

aening khynnaw nynh thua.

8 Rang oh, Bawipaw a ryalawnaw hynh

dotua oh; laephi vawlan

a thuakhaepaw ronaw hynh dotua oh.

9 Laephi pynpi adianaw cia

rhaw a daesah;

li kha khya zah ccoi kha

zoihtatyh lan a khya;

khawriaphua hae kha maee te a u.

10 "Zya dae oh, kae tuh Pachia nynh

ka thua cipaw nyh oh!

Minphuin hae kya kae tuh

hangthung ka thua,

laephi kya hangthung ka thua," a ci.

11 Vaaw Bawipaw tuh

aening kya a um;

Jakob Pachia tuh

aening khynnaw nynh thua.