1 Bawipaw kha thehoysah oh!

Bawipaw kha miding hae

tungkunaw kya thuasah,

zapi pumkunaw kya thuasah

ka thinlung balyn te the ka hoysah cih.

2 Bawipaw ryalawnaw tuh

myarya alesae, tuh-e ryalaw kya

a lungrythuapaw balyn nynh

ccangku a ry hae.

3 A ryalaw tuh sawtuanaw,

lesaenaw te phe beih zah,

a dingnaw tuh zungzae atyn.

4 Ngaeangthua lan umpaw

a ryalaw hae kha yn ningsah khyh;

Bawipaw tuh thawccih thyapaw te

ngaethyaumsah thyapaw nynh thua.

5 Amaw a rih hae paw kha looh a pya hae;

a byakinnaw kha kharouh ning khyh.

6 Minphuin ccangpaw hae rho kha

a ccungccaw hae kalan pyate,

a ryalawnaw huhan kha

a ccungccaw hae kya a langsaku vae.

7 A kuih te rya a lawpaw balyn tuh

zyn lan um zah ading;

a kawbya balyn tuh doliaku lan a um.

8 Tuh-e hae tuh lungzinaw te

dingnaw khate

pyapaw athua keiccu hae ze,

zungzae te zungzae cia atyn hae.

9 A ccungccaw hae hanlan

shawkhawnaw a raepya hae;

a byakinnaw kha zungzae hanlan

kaw a pya vae. A min tuh thyaa zah

rawri sawtua lan a um!

10 Bawipaw rawrinaw tuh

hawnaw athotakawnaw nynh thua;

tuhcite kawbya a zuipaw balyn tuh

ahoypaw nythyanaw a hoi hae.

Amaw kha thehoysahnaw tuh

zungzae atyn.✝