1 Bawipaw kha ka sungsah,

pawccecize ka roi te

ka bohkunaw bya kha yn thaepya.

2 A nakaring kha yn tuapyaku keiccuze

ka hiin lungkhu balyn amaw kha ka ko cih.

3 Chinaw kaang nynh phang yn koihlu;

Sheol kya-e vawsawnaw nynh yn kyng zah,

riathaenaw te thinphangnaw kha ka teing.

4 Tetuh "Pou Bawipaw , saw ka sang,

ka hiinnaw hynh beih yn khum!" cite

Bawipaw min kha ka ko.

5 Bawipaw tuh thawccih thyapaw te

a dingpaw nynh thua; ah Pachia tuh

ngaethyaumsah thyapaw nynh thua.

6 Bawipaw nynh bawmtu

hoi lei hae paw kha a thungkhaw hae;

he yn dothatheih vae hae ze,

aning nynh yn khum.

7 Bawipaw tuh ka tungvaw

myarya ahoy keiccuze

Pou ka muisaw, ngaengante umtua.

8 Bawipaw nynh ka hiinnaw kha

chinaw kyate thuasah,

ka mit kha mitphi luanaw kyate thuasah,

ka ccu kha thykunaw kyate thuasah

yn luesah vae.

9 A hiin hae paw ram kyakhe

Bawipaw malang cciate ka hiin.

10 "Kae tuh riathaenaw myaryamaw

ka teing," ka ci lya heize,

ka zynnaw tuh tynkaring.✝

11 "Ccungccaw miakaw tuh

mihyn hae nynh thua," cite

bungzoute ka ho.

12 Bawipaw tuh ka tungvaw

eih ahoy keiccuze

aning kha pawmou ka pyaru cih?

13 Khumnaw banang kha ka hang cih zah,

Bawipaw min kha ka ko cih.

14 Bya ka kinkupaw kha

Bawipaw ccungccaw hae balyn malang khe

amaw kha ka pya cih.

15 A mithyaa hae nynh a chi hae paw tuh

Bawipaw muihnaw kya myarya aphute.

16 Pou Bawipaw , kae tuh

na ryalahtu nynh ka thua;

kae tuh na ryalahtunung ccaaw,

na ryalahtu nynh ka thua.

Yn khiinaw hae paw kha nae supya vae.

17 Namaw kalan lungtua silawnaw kha

ka rae cih zah,

Bawipaw min kha ka ko cih.

18 Bya ka kinkupaw kha

Bawipaw ccungccaw hae balyn malang khe

ka pya cih.

19 Pou Jerusalem, na ngaelung a umpaw,

Bawipaw inn voidu lungkhu khe ka pya cih.

Bawipaw kha thehoysah oh!