1 Bawipaw, nang tuh she takyh kya

kae khynnaw nynh na thua.

2 Mua hae na rae mawze,

laephi pynpi na rae mawze

nang tuh athonaw kyate

athangnaw kyacia

Pachia nynh na thua.

3 Ccungccaw hynh laenoi kalan

nae kisah zah,

"Ccungccaw hae nanning, ki oh," na ci.

4 Na malang tuh kum thong kheit hynh

athang vae paw inkhawnin hawte thua zah,

khuazi ccyh ccyhkheit hawte nynh athua.✝

5 Ccungccaw hae kha phe thyaa lan

na phi hae;

minmin tuh maan hawte thua hae zah,

awkhua ccyh kya atoih thawpaw

lonua hawte nynh athua hae;

6 tuh-e lonua tuh awkhua ccyh lya

yn paw zah yn lethung;

zete ccyh vae tuh baluh naan zah

arou vae.

7 Na thinrianaw keiccuze kaening kha

marya ro kae thua vae;

na thinrianaw keiccuze

tae kae thua vae.

8 Kae hoyleinaw kha na malang khe

na nung zah,

aruh lante kae raepaw seinaw kha

marya na muih vae.

9 Na thinrianaw nynh kae hiinshe

oun dynsah;

kae hiinshe tuh vaekheit hysawpaw te

nynh aloku.

10 Kae hiinshe tuh

kum sung sari nynh asae;

kae thawzung a um ze

kum sung tarya mah asae kho;

tuhzemah kae hiin lungkhu kya

vawsawnaw te

ngaethyanaw mawcci nynh kae tung;

kae hiinnaw tuh aro maw

thang zah phe kae zo.

11 Na thinrianaw huhan kha

hummou a nyhthya?

Na thin-unaw kha ri lan accan thyhte

hummou a rih?

12 Tukeiccuze kae ccyh riathyanaw kha

oun ccangpya tua,

tuhteze nynh kae thinlung

a haw kho cih.

13 Pou Bawipaw , yn kitua!

Hohseciamou aro ung cih?

Na see hae tungvaw

ngaethyaumsahnaw beih hoitua!

14 Atynpaw na sungsahnaw te

awkhua takyh kae lungrya

oun chisah tua.

tuhteze tuh kae hiin lungkhu balyn

kae lungtua cih zah kae lungpaw cih.

15 Vawsawnaw nae ingsah ccyh

asae thathyhte,

hoyleinaw kae tungpaw akum

alung thathyhte lungtuanaw oun pyatua.

16 Na ryalaw tuh na see hae kya

langkuh sah lah,

na phu-enaw huhan tuh

mih ccaaw hae kya langkuh sah.

17 Bawipaw kae Pachia kya-e

maehoynaw tuh kae tungvaw

um sah lah,

kae cyipaw ryalaw tuh kaemaw elang

hoynaw um sah,

Kae kuih nynh rya a lawpaw kya

kae laan kae sui ua vae sah.