1 Pou Bawipaw ka Pachia,

namaw kya ka rekuh;

yn deehuitu hae balyn kyate

yn khum lah, yn luesah,

2 tuhkhyhze tuh yn khum lanpaw um leite,

kae kha dae yn sue cih hae,

chindeih hawte kae kha

zoihtatyh lan yn pae cih hae.

3 Pou Bawipaw ka Pachia,

tuhcite ka cyi lanze thuasah,

ka kuih kya cyiseinaw a um ze thuasah,

4 ka ruiban tungvaw vawsawnaw pyate

ka liaru ze thuasah,

ka rhawpaw kha akonglang um leite

ka luade ze thuasah,

5 ka rhawpaw nynh yn dee sah lah,

yn phah sah,

ka hiinnaw hynh laephi kya

yn syde sah lah,

ka muisaw hynh laenoi kya

yn nung sah.

6 Pou Bawipaw , thinriate thoku tua;

ka rhaw hae thinrianaw kha

rawse khylan thawzung thuatua;

Pou ka Pachia, kamaw hanlan

thaekuh lah, byapianaw kha raetua.

7 Ccungccaw zapi nynh sueluakute

nang kha ae koihlu hae sah lah,

ahangnaw kyate uk hae.

8 Bawipaw nynh ccungccaw hae kha

bya a pia hae;

Pou Bawipaw , ka dingnaw thyhte thuasah,

ka hoynaw thyhte thuasah

bya yn piatua.

9 Ccungccaw hoylei hae paw kya-e

hoyleinaw kha thangsah lah,

miding hae kha tynsah tua hae,

Pou adingpaw Pachia,

nang nynh tuh thinlung te

tuanaw kha phe na do mamia.✝

10 Pachia tuh ka khawriaphua nynh thua,

thinlung a ding hae paw kha

a khum hae.

11 Pachia tuh adingpaw byapiatu thua zah,

ccungccaw hoyleipaw kha

zungzae thin a rianua paw Pachia nynh thua.

12 Lukhakheit tuh a ngaesiku khyh ze,

Pachia nynh thaloi kha

a tawnuakuh cih;

a li kha sue zah, phang a ee;

13 chianawpaw a zunghe hae kha

a paccynku vae,

a the kha maee lang a ruasah vae.

14 Dotua oh, minmin nynh

hoyleinaw kha a tuaku hae,

ahoy leipaw paccynkunaw kha

ccaaw lang poi hae zah,

hynnaw kha ccaaw lang a saah hae.

15 Hunghua kha myarya khu lan

thae hae zah,

a thae hae paw hunghua

lungkhu langkhe mimaw tuh

a ccah hae.

16 Mih rysawthyanaw tuh

mimaw lu kalan yn ki zah,

mih puathonaw tuh

mih lu vawlan khe accah.

17 Bawipaw tuh a dingnaw keiccuze

lungtuabya ka ho cih zah,

Ahang Huaccepaw Bawipaw min kha

hlaw te the ka hoysah cih.