1 Bawipaw kha ka thinlung balyn te

ka thehoysah cih;

ngaeang lan umpaw

na raepaw balyn kha ka ho cih.

2 Na tungvaw myarya ka lungtua cih;

Pou Ahang Huaccepaw,

na min kha thehoysahte

hlaw ka sah cih.

3 Ka rhaw hae tuh nulang

he a ki hae te,

na malang khe khuliakuh hae zah

a chih hae.

4 Pawccecize kae kha pankhawte

bya na pia vae;

bawitungkhung kya na haung zah,

adingpaw byapianaw kha na rae vae.

5 Pachia beik leipaw minphuin hae kha

na thuihei vae hae,

ccungccaw hoylei hae paw kha

na ro vae hae;

mih min kha zungzae te

zungzae cia na the vae.

6 Rhaw hae tuh zungzae ronaw kya

a zo vae hae;

mih khuapi hae kha

phe na ro mamia vae hae;

minmin syntawnawpaw miakaw tuh

azo vae.

7 Thuasalama Bawipaw bawitungkhung tuh

zungzae atyn;

byapianaw hanlan a bawitungkhung kha

a tynsah vae.

8 Laephi kha dingnaw te bya a pia;

ccungccaw hae kha laesah leite

bya a pia hae.

9 Bawipaw tuh tuaasahkunaw

a teing hae paw hanlan

rekunaw thua zah,

vawsaw tung lya rekunaw nynh thua.

10 Te na min a nyh hae paw nynh

nang kha ae doliaku hae,

pawccecize, pou Bawipaw ,

nang ae ccung hae paw kha

na vua boi khyh hae.

11 Zion kya umpaw Bawipaw kha

hlaw te thehoysah oh.

a ryalaw kha minphuin hae kalan hopah oh.

12 Pawccecize chiise a luasahtu hae kha

tyty nyh hae zah,

vawsaw a tung hae paw siaruanaw kha

ningpah khyh hae.

13 Pou Bawipaw , thaw beih yn ccitua.

Yn hua hae paw nynh

yn teingsah hae paw hynh

yn muihpya tua;

nang tuh chinaw kyate

yn luesahtu nynh na thua,

14 tetuh na thehoynaw balyn kha

Zion ccanung koikua hae kyakhe

ka ho cih,

nae khumnaw keiccuze ka lungtua cih.

15 Pachia nyh leipaw minphuin hae tuh

mimaw nynh a thae hae paw

hunghua lungkhu lang a ccah vae hae;

a sya hae paw kaang kyakhe

mimaw ccu tuh a kae vae.

16 Bawipaw nynh a byapianaw khate

amaw toulou kha a langsaku vae;

ccungccaw hoylei hae paw tuh

mimaw kuih te a law hae paw

ryalaw kyakhe kaang a kae hae.

17 Ccungccaw hoylei hae paw te

Pachia a ning hae paw

minphuin hae balyn tuh

michi khua lang a cceih cih hae.

18 Ahoboupaw ccungccaw hae kha

palei ning thua lan khyh zah,

ryachi hae tuh ngaehoinaw hoi leite

um zungzae lan khyh hae.

19 Pou Bawipaw , thoku tua,

ccungccaw nynh nang kha

ae tae nan sah;

minphuin hae tuh na malang khe

byapianaw ing hae sah.

20 Pou Bawipaw , minmin kha

mih thinphangsah tua hae;

ccungccaw nynh hung kae thua

cipaw nyhkuh hae sah.