1 Bawipaw kha thehoysah oh!

Bawipaw tuh hoy zah,

a sungsahnaw tuh zungzae atyn keiccuze

amaw kalan lungtuabya ho oh.✝

2 Bawipaw nynh a cyipaw

alesaepaw balyn kha

hum nynh mou a ho kho cih?

Hum nynh mou a thehoynaw balyn kha

a ho kho cih?

3 Byading kha zui zah, dingnaw kha

zungzae a raepaw tuh

lungtuapaw nynh thua.

4 Pou Bawipaw , na ccungccaw hae kya

maehoynaw he na langsakuh te,

kae kha yn liathuitua;

minmin kha he na luesah hae te,

kae mah yn bawmbua;

5 na po hae paw kya

hoynaw kha ka muih nawlan,

na minphuin a lungtuanaw kya

ka lungtuabua nawlan,

te na rho athua hae paw kya

ka lungtuabua nawlan kae kha yn liathuitua.

6 Kaening te kae minpaaw hae tuh kae sei vae;

hoyleinaw kha kae rae vae;

ahoy lei lante kae cyi vae.

7 Kae minpaaw hae Izip ram kya

a la um lya hae ze

ngaeang lan umpaw

na ryalawnaw hae kha

tuathyanaw la hoi khyh hae;

myarya lepaw atynpaw

na sungsahnaw kha la liathui khyh hae,

Rili Se kyakhe Ahang Huaccepaw kha

a dou hae.✝

8 Tuhzemah alesaepaw

a huhan kha langsah khylan,

amaw min hanlan

minmin kha a khum hae.

9 Rili Se kha kawpya zah karae arou;

laerou kya cciakhae hawte

akhupaw kya po a cciakhae hae.✝

10 Tuhcite minmin kha

mih rhaw hae kuih kyate khum hae zah,

rhaw hae kuih kyate a luesah hae.

11 Mih rhaw hae kha tui nynh

marya vu hae zah,

lu kheit sanmah lue khyh hae.

12 Tetuh minmin nynh

amaw bya kha zyn hae zah,

a thehoysahnaw hlaw kha a sah hae.✝

13 Thuasalama aro mawkhe

a bya kha a ning hae;

amaw kya-e tuanaw pyakunaw kha

ngaehoikuh khyh hae.

14 Ramkaw khe ryduaanaw

myaryamaw hoi hae zah,

laesia ram kya Pachia kha

a syntawtua hae;✝

15 minmin nynh a ngia hae paw kha

aning nynh a pya hae,

thuasalama ri lan umpaw ccinaw kha

a sawnua hae.

16 Minmin nynh ryahmin kyakhe

Moses tungvaw te

Bawipaw kya-e athyaapaw

Aaron tungvaw kya

eiungnaw a hoi hae.✝

17 Laephi nynh haehae ua zah

Dathan kha po a laang,

Abiram te a innbyn hae kha

pong a thei hae.

18 Minmin a zui hae paw kyakhe

maee-u zah, maeesoi nynh

ccungccaw hoylei hae paw kha phe a u hae.

19 Minmin nynh Horeb kyakhe

vaetuataw kha raekuh hae zah,

a laeeku hae paw zohtuh kha

a beik hae.✝

20 Pachia phu-enaw kha

lonua a aepaw vaetua zuh lang a rulae hae.

21 Minmin nynh mih Khumtu athuapaw

Pachia kha a ning hae;

aning tuh Izip ram kya myarya lepaw

uccaw hae a raetupaw thua zah,

22 Ham ram kya ngaeang lan umpaw

uccaw a raetupaw te,

Rili Se kya ri lan umpaw

uccaw a raetupaw nynh thua.

23 Tukeiccuze Pachia nynh minmin kha

ka roh cih hae a ci;

tuhzemah a popaw Moses nynh

Pachia malang thadyn zah,

minmin kha a ro khyh nawlan hae

Pachia thinrianaw kha a daesah.

24 Oute minmin nynh ram hoypaw kha

pawlangria khyh hae zah,

a byakinnaw kha zyn khyh hae.✝

25 Mih bu kyakhe ccohkuh hae zah,

Bawipaw bya kha ngae khyh hae.

26 Tukeiccuze a kuih kha hang zah,

"Minmin hynh ramkaw kya

ka khulia cih hae,

27 mih ciihan hae kha

minphuin ccangpaw hae laku kya

ka zosah cih hae zah,

ccangpaw ram hae kya

phiariphiarae ka nung cih hae," cite

minmin kya bya a kinku.✝

28 Tetuh minmin nynh Peor kya umpaw

Baal pachia kha beikbua hae zah,

achihpaw kalan a pya hae paw

silawnawpaw kha a aebua hae;✝

29 mih cyisahnaw te Bawipaw kha

thinriasah hae zah,

ccinaw alepaw kha minmin kya a pousah.

30 Oute Finehas nynh thadyn zah

bya a pia keiccuze

ccinaw alepaw tuh phe adae.

31 Tuh-e tuh Finehas a dingnaw lang

she takyh kya zungzae riapya athua.

32 Minmin nynh Meribah tui kyakhe

Bawipaw kha a thinriasah hae zah,

minmin keiccuze Moses tuh

vawsawnaw a tung;✝

33 Moses kha myaryamaw

a thin a riasah hae keiccuze,

aning nynh ho lan

accan leipaw cia kha phe a ho.

34 Bawipaw nynh kaw a pya hae thyhte,

minmin nynh minphuin ccangpaw hae kha

roh khyh hae,✝

35 tuh-e minphuin hae ryte pykuh hae zah,

tuh-e hae nynh a cyi hae hawte

cyi lan a ccangku hae.

36 Minmin nynh mimaw hanlan

kaang lang atangpaw

mih zohtuh hae kha a beik hae.

37 Mih ccanung hae te

mih ccapaw hae khate

raerangsaro hae kha si a law hae;✝

38 seinaw a hoi leipaw chiise,

mih ccanung hae te

mih ccapaw hae chiise khate

Kanaan zohtuh hae kha si a law hae,

tuh-e ram tuh chiise te a nungsikuh.✝

39 Tuhcite mih cyisahnaw keiccuze

athyaa leipaw lang a tang hae,

mih cyisahnaw kya a ohhuaku hae.

40 Tetuh Bawipaw thinrianaw tuh

a ccungccaw hae tungvaw

maee lang rua zah,

a rho kha a hua vae;✝

41 minmin a huatu hae nynh

minmin kha uk khylan

minphuin ccangpaw hae

kuih kalan a pya hae.

42 Mih rhaw hae nynh minmin kha

tuaasah hae zah,

mih rhaw hae kuihkaw khe

nung athua hae.

43 Minmin kha avae patae a luesah hae,

thuasalama minmin nynh

mih rynaw kyakhe amaw kha

a dou hae,

te mih hoyleinaw keiccuze

nyaasah athua hae.

44 Tuhzemah mih siaruanaw kha

he a thaepah hae te,

mih riathaenaw kha pe a kipya hae.

45 Minmin hanlan

a byakinnaw kha liathui zah,

atynpaw a sungsahnaw alepaw liate

ngaethyaumsahnaw kha a langsaku.

46 Minmin a kyngtu hae paw balyn kyakhe

ngaethyaumsahnaw a hoisah hae.

47 Pou Bawipaw kae Pachia,

kaening hynh oun khumtua,

minphuin ccangpaw hae laku kyate

oun sueluatua,

tuhteze nynh athyaapaw na min te

namaw thehoysahnaw kya

phu-enaw kha lungtuabya kae ho cih.✝

48 Israel Pachia Bawipaw kha

zungzae te zungzae cia thehoysah oh.

Ccungccaw balyn nynh,

"Amen" ci hae sah.

Bawipaw kha thehoysah oh!