1 Pachia tuh thokuh sah lah,

a rhaw hae tuh phiariphiarae um hae sah;

amaw a hua hae paw tuh

amaw malang khe ccue hae sah.

2 Maeekhuh kha khisan nynh

a mung hawte, minmin kha

ccaring a mung hae;

khoilung tuh maee malang

palae atui hawte,

ccungccaw hoylei hae paw tuh

Pachia malang roh hae sah.

3 Thuasalama miding hae tuh

mih lungtua sah lah,

Pachia malang mih lung myarya tua sah;

lungtua lungpawte um hae sah.

4 Pachia kalan hlawsah oh,

amaw min kha thehoysahnaw hlawsah oh;

maeking vawlan a ccikuhpaw kha

hlawsahpah oh,*

a min tuh Bawipaw nynh thua,

amaw malang nae lungtua sah.

5 Ngawraw hae paaw thua zah,

nomae hae kha

a thungkhaw hae paw tuh

a beikinnthyaa kya a umpaw

Pachia nynh thua.

6 Pachia nynh vaevui zah

a lanmepaw ccungccaw kha

umnaw inn a pya;

thongccah hae paw kha

hoirumnaw kalan a cciakhae hae,

thuasalama kaw-ei hae paw kha tuh

ramrou kya a um hae.

7 Pou Pachia, na ccungccaw hae malang

na cceih zah, ramkaw kya

po he na cciakhae hae te,

8 laephi tuh hy zah, vaawlui kyate

khuaa arah,

tuh-e tuh Sinai Pachia,

Pachia a umnaw, Israel Pachia,

Pachia a umnaw kya nynh thua.✝

9 Pou Pachia, khuaa patae na rawsah zah,

na rho athuapaw ram arou vae paw kha

ramnopaw lang bua na tangsah.

10 tuin kyakhe na ccungccaw hae nynh

umnaw a muihku hae;

Pou Pachia, na hoynaw liate

ryachi hae kha na bawm hae.

11 Bawipaw nynh kaw a pya hae;

tuh-e thongpang tuh nopi phu hae nynh

cciakhae hae zah:

12 "Rhawkaw hae mih siapharan hae tuh

phe ccue hae!" a ci hae.

Inn kya umpaw nopi hae nynh

a luade hae paw uccaw hae kha

a neeku hae,

13 tuh-e uccaw hae tuh

tuukhia lungkhu a um hae zemah,

ngun te theikuhpaw vahu sake hawte

thua hae zah,

sui ahinpaw te theikuhpaw

aming hawte mah athua hae.

14 Athunghuapaw Pachia nynh

siapharan hae he a phianaw hae tuh

Zalmon Mua vawlan

accahpaw vuiraw hawte nynh thua.

15 Pou alesaepaw mua, Bashan mua,

ahangpaw sangpyng patae

a hoipaw mua, Bashan mua!

16 Ahangpaw sangpyng patae

a umpaw mua nynh,

Pachia nynh um nawlan a rypaw mua,

Bawipaw nynh zungzae

a umnaw lanpaw mua kha

pawccemou na eiung?

17 Athungpaw marangle athong-asan te

Bawipaw tuh Sinai Mua kyate

hmin thyaa lungkhu lang a tee.

18 Bawipaw tuh ahangnaw langkhe kae zah,

kyngpaw ccungccaw hae kha

ataruinte a cciakhae hae,

ccungccaw hae kyate thuasah,

amaw a dou hae paw kyate heize

thuasah lasung a mue,

Bawipaw Pachia tuh tuin kya

a um cih.✝

19 Nin takyh aening phupaw oun phupahpaw

Bawipaw tuh thehoyte um sah;

Pachia tuh aening khumnaw nynh thua.

20 Ah Pachia tuh khumnaw Pachia nynh thua,

chinaw kyate luenaw tuh PACHIA,

Bawipaw kya-e nynh thua.

21 Thuasalama Pachia nynh

a rhaw hae lu kha thuasah,

seinaw laanpi a zui hae paw lu kha thuasah

a koi ccaccing cih hae.

22 Bawipaw nynh,

"Minmin kha Bashan kyate

ka kikhae cih hae,

minmin kha rili akhupaw kyate

ka kikhae cih hae,

23 tuhteze nynh na rhaw hae

chii kyakhe na ke cih,

na ui hae nynh mah mih ry zeihte

a lya cih hae," a ci.

24 Pou Pachia, huhan te na cciapaw kha

muih athua vae,

ka Pachia, ka Siapharan nynh

beikinnthyaa lungkhu lang

a teepaw kha muih athua vae,

25 malang te hlawsah hae paw,

nulang te a khuathya hae paw,

tuh-e hae laku khe tyng a khua hae paw

nopi hae a cceih hae:

26 "Ccungccaw zapi pumkunaw kyakhe

Pachia kha thehoysah oh,

Pou Israel ciihan hae, Bawipaw kha

thehoysah oh!"

27 Malang kou khe, minmin lakuze

asoi huapaw Benjamin phin hae

a cceih hae,

te Judah phin cciakhaetu hae te

mih ccungccaw hae,

Zebulun phin cciakhaetu hae te

Naftali phin cciakhaetu hae nynh a zui hae.

28 Pou Pachia, na thungnaw kha

langsaku tua;

Pou Pachia, langmawlya kaening elang

nae cyipya vae hawte,

na thawzung kha langsaku tua.

29 Jerusalem khua umpaw

na Beikinnpi liate

siapharan hae nynh na kalan

lasung ae ccyngpya hae.

30 Phaeku laku a umpaw

ramsaw hae kha thuasah,

vaetua anopaw phu kha

minphuin hae kya-e vaetua

ano hae paw kha thuasah thuihei hae.

ngunphua myarya a duaa hae paw kha syde hae;

rhawtuknaw kya mih lungrythuapaw

minphuin hae kha phiariphiarae nung hae.

31 Izip ram kyate sawpaw locceihtu hae

oun thua cih hae;

Ethiopia ccungccaw hae nynh

Pachia kalan mih kuih kha

arangte dyng hae sah.

32 Pou laephi peenaw hae,

Pachia kalan hlawsah oh;

33 Pou vaawlui a ccikuhpaw,

arynpaw vaawlui hae,

Bawipaw kalan thehoysahnaw

hlawsah oh;

amaw roi, athungpaw roi a sawpaw kha

ngaetua oh.

34 Pachia huhan tuh ahoy cite hotua oh,

a lesaenaw tuh Israel hae tungvaw a um;

a huhan tuh vaawlui kya a um.

35 Pachia, Israel Pachia tuh

a beikinnthyaa kya

ri lan umpaw nynh thua;

a ccungccaw hae kha huhan te

thawzung a pya hae.

Pachia tuh thehoysah thua sah!