1 Ka thinlung tuh bya hoypaw te phe abeih,

siapharan elang hlaw ka phua lyahin;

ka lae tuh ccaw zeithyapaw

bawpe te nynh aloku.

2 Nang tuh pise hae lakuze

pynrua apuithya

huaccepaw nynh na thua;

na munglae kya thawccinaw bya te

phe abeih;

tukeiccuze Pachia nynh nang kha

zungzae hythua ae pya.

3 Pou athungpaw siapharan,

na phu-enaw te na lesaenaw

na thaloi kha na phae kya saeku tua.

4 Byaccing te dingnaw kha

tynsah khylan

na lesaenaw langsakute taenaw khate

cciku tua.

na ranglang kuih nynh ri lan umpaw

ryalaw kha ae ccangpah sah.

5 Na the tuh he zah,

siapharan a rhaw hae bung kyacia

a thuing hae;

ccungccaw hae tuh na ccuphe kaw

a khuliakuh hae.

6 Pou Pachia, na bawitungkhung tuh

zungzae te zungzae cia atyn.

Na ram kha dingnaw te na uk;✝

7 dingnaw kha na ry zah

hoyleinaw kha na hua.

Tukeiccuze na Pachia athuapaw Pachia nynh

na ruiban hae laeze

nang kha lungtuanaw chitui ae thuh vae;

8 na angkiccuapaw tuh mura zimuin,

aloes zimuin te kassia zimuin hae khate

a myn akhuh.

Saepaw nua te sakpaw siapharan inn hae kyate

arui suikuhpaw khuakupaw uccaw hae nynh

na lung ae pawsah hae;

9 sawtua lan umpaw na nopi hae kyakhe

siapharan ccanung hae mah a umbua hae;

na ranglang khe Ofir sui hoypaw

a lawkuhpaw siapharannung a thadyn.

10 Pou ccanung, ngaetua, tuatua lah,

na nakaring yn tuaku tua;

na ccungccaw hae te

na paaw inn kha ningtua,

11 siapharan nynh na puithyanaw kha a ry cih.

Aning tuh na bawipaw athua keiccuze

amaw kha beiktua;

12 Tair khua e ccungccaw hae nynh thuasah,

a hoi huaccepaw ccungccaw hae nynh

sisua aphuinphuin te thuasah,

lasung khate namaw kya

maehoynaw yn ccungkuh cih hae.

13 Siapharan ccanung tuh

amaw khaan lungkhu khe

sui law te kuakuhpaw boeining kha

lawkute a um;

14 myarya puithyapaw a boeining khate

siapharan kalan a cciakhae hae;

liaccady hae te a ruiban hae nynh

a nulang te a zui hae.

15 Lungtua lungpawte cciakhae hae zah,

siapharan inn lang a tee hae.

16 Pou siapharan, nang nynh

na minpaaw hae ccelang,

ccapaw hae kha na saah cih;

minmin kha laephi pynpi kya

uktu hae lang na tangsah cih hae.

17 She takyh kya na min ka thaansah cih;

tukeiccuze ccungccaw hae nynh

zungzae te zungzae cia

ae thehoysah cih hae.