1 Bawipaw kalan lungtuabya ho oh,

a min kha ko oh lah,

a cyipaw kha ccungccaw hae nysah oh.

2 Amaw kalan hlawsah oh,

thehoysahnaw hlawsah oh;

ngaeangthua lan umpaw

a ryalaw balyn kha ho oh.

3 A min thyaapaw kha phu-esah oh;

Bawipaw a ccung hae paw thinlung tuh

a lungtua sah.

4 Bawipaw te a thawzung kha ccungtua;

a mitmae kha ccung zungzae oh.

5,6 Pou a seepaw Abraham ciihan,

a popaw Jakob ccaaw hae,

ngaeang lan umpaw a la cyipaw,

ngaeang lan umpaw a ryalaw hae te

a hopaw byapianaw kha liathui oh.

7 Aning tuh Bawipaw ah Pachia nynh thua;

a byapianaw tuh

laephi pynpi hanlan nynh thua.

8 A byakinnaw kha zungzae peki zah,

kaw a pyapaw kha

she thong kheit cia ning khyh,

9 Abraham kya a raepaw byakinnaw,

Isak kya a kinpyakupaw a byakinnaw,✝

10 Jakob kya phungbya lante tynsah zah,

Israel kya zungzae tynpaw

byakinnaw lante a tynsah,✝

11 "Kanaan ram hynh rho lang kae pya cih,"

a la cipaw kha a liathui.

12 Minmin tuh milu beihtaraw kyalya cih hae zah,

ramccang ccungccaw lang tangte

13 ram kheit kyate ram kheit kalan,

pee kheit kyate ccangpaw pee kheit kalan

he a khiavuikuh hae tuh,

14 minmin tungvaw tuaasahnaw rae lan,

aning nynh humhung sanmah ua khyh;

minmin keiccuze siapharan hae kha

pe hae zah,✝

15 "Chitui ka thuh hae paw kha ty nan oh;

ka profeh hae kha

vawsaw pya nan oh," a cipya hae.

16 Bawipaw nynh mih ram kyakhe

ccakanccisah zah,

mih looh miakaw kha

he a ropah hae te,✝

17 see lang a zua hae paw Josef kha

mih malang a saw.✝

18 A ccu kha sivawrui te khii hae zah,

a nging kyakhe sivaw a oisaku hae;✝

19 a la hopaw bya accing mawlaezung

Bawipaw bya nynh

amaw kha a syntawtua.

20 Siapharan nynh saw zah a luesah;

minphuin hae a uktupaw nynh

amaw kha a luesah.✝

21 A ram uktu lang tangsah zah,

a hoipaw uccaw balyn kha

a uktu lang a nung,✝

22 siapharan kuihkaw e bawi hae kha

thuihei khylan te

siapharan kuihkaw e piccan hae kha

hawnaw te ccangpya khylan a nung.

23 Oute Israel tuh Izip ram lang a thua,

Jakob tuh Ham ram kya

ramccang ccungccaw lante a um.✝

24 Te Bawipaw nynh a ccungccaw hae kha

myarya pungzaesah hae zah,

mih rhaw hae laeze

a thawsae huapaw lang a rae hae,✝

25 Izip hae nynh a ccungccaw hae kha

hua khylan te a see hae kha thyaruhnaw te

phee khylan Izip hae thinlung kha a paleih.

26 Aning nynh a seepaw Moses te

a po vae paw Aaron kha a saw hae.✝

27 Minmin nynh Izip hae kyakhe

amaw kya-e muihsahnaw hae kha rae hae zah,

Ham ram kya ngaeangnaw hae kha a rae hae.

28 Ram lungkhu kya mohnaw kha saw zah,

ram kha a mohsah;

thuasalama Izip hae nynh a bya kha

zui leite a rawse hae.✝

29 Mih tui kha chiise lang tangsah zah,

mih ngasaw kha a chisah.✝

30 Mih ram tuh buphaw te phe beih zah,

mih siapharan inn kya heize phe abeih.✝

31 Pachia nynh kawpya zah

myn hae te maseih hae tuh

mih ram pynpi kya phe abeih.✝

32 Khuaatui hanpaw hya kha ccawsah zah,

mih ram pynpi kya ria a kawsah.✝

33 Mih misu ku hae te thaeku ku hae kha roh zah,

mih ram e thingku hae kha pong akhya.

34 Kawpya zah tungkhipaw hae tuh oun thua hae,

riatae leipaw tungkhipaw adih hae paw tuh

oun thua hae zah,✝

35 mih ram e thingku-ruaku

aphuinphuin kha marya a ae hae,

mih laephi kya-e athae hae kha mah

marya a ae hae.

36 Mih thawzung balyn kyate

masaty a poupaw

mih ram kya-e ccatawccaw balyn kha a chia.✝

37 Oute Israel kha sui te ngun ryte a poukhae,

mih phin raveih kya

a thawzyapaw lu kheit san um khyh.✝

38 Izip hae nynh minmin kha

a ri hae keiccuze,

minmin he a pou hae tuh

Izip hae mih lungtua.

39 Minmin luki khe maeking kha

dawpah hae zah,

khuazi kya a aw ccaw cite

maee kha a pya hae.✝

40 Minmin nynh ngia hae zah,

vamyng kha a pya hae,

vaawlang te looh patae a pya hae.✝

41 Lungpi kha hung zah tui tuh a pou;

tuh-e tui tuh vawpi hawte

laesia ram kya po alua.✝

42 Pawccecize a seepaw Abraham kya

a la raepaw athyaapaw

a byakinnaw kha a liathui.

43 Tuhcite a ccungccaw hae kha

lungtuate a cciakhae hae,

a po hae paw kha hlawsah biate

a cciakhae hae.

44 Minphuin ccangpaw hae ram kha

minmin kalan pya hae zah,

minmin nynh tuh-e hae hoirumnaw kha

a hoi hae paw uccaw lang a lawku hae,✝

45 tuh-e tuh a ccungccaw hae nynh

a phungbya kha zui hae zah,

a upadi hae kha a zui ccaw hae cite

a cyipaw nynh thua.

Bawipaw kha thehoysah oh!