1 Mih hiinnaw kya ccaenaw um leipaw te

Bawipaw kawbya a zui hae paw tuh

lungtua hae paw nynh thua.

2 A phunglang a zui hae paw,

mih thinlung balyn te

amaw a ccung hae paw te

3 hoyleinaw rae leite,

a laanpi a zui hae paw tuh

lungtua hae paw nynh thua.

4 Na kawbya hae kha zuakute zui lan

kaw nae pya vae.

5 Na phungbya zuinaw kyakhe

ka laanpi tuh tyn vae sah!

6 Tetuh na kawbya balyn kha

hoyte dokute,

maethyanaw ka mue lan khyh.

7 Adingpaw na phungzae kha

he ka nyh te, thinlung adingpaw te

nang kha kae thehoysah cih.

8 Na phungbya kha ka zui cih;

kae kha kharouh beih yn vua nan.

9 Mino hae nynh mih laanpi kha

pawtemou a thyaasah kho cih hae?

Na bya thyhte raeringkunaw liate

a thyaasah cih hae.

10 Ka thinlung balyn te

nang kha kae ccung; na kawbya kyate

ccanglang yn cciasah sei nan.

11 Na tungvaw ka sei khyh nawlan,

na bya kha ka thinlung kya ka ccykeku.

12 Pou Bawipaw , nang kha

kae thehoysah;

na phungbya kha beih yn ccangpah.

13 Nae hopyapaw na phungzae balyn kha

ka siakhae cih.

14 Hoirumnaw patae kya

lungrythuakhaeku hawte,

na phunglang kyakhe

ka lungry a thuakhaekuh cih.

15 Na kawbya kyakhe ka thinlung kha

tyty ka nung cih zah,

na laanpi kha hoyte ka dokuh cih.

16 Na phungbya kyakhe

ka lungrythua cih zah,

na bya kha ka ning lan khyh.

17 Ka hiin zah na bya ka zuithya nawlan,

na ryalahtupaw tungvaw kya

hoynaw raetua.

18 Na kawbya lungkhu e

ngaeangthua lan umpaw

uccaw hae kha a muih nawlan,

ka mit yn awsah tua.

19 Laephi vawlan hin mikhia hawte ka um;

na kawbya kha ka kyate thuruh nan.

20 Na phungzae kha

eih a ry zungzae keiccuze

ka muisaw tuh maee lang arua.

21 Na kawbya a zui lei hae paw

thyalaw athua hae paw te

a lysakuh hae paw kha na thuihei hae.

22 Na phunglang kha ka zui vae keiccuze,

yn theihryanaw hae te

yn dothatheihnaw hae kha

ka kyate yn lawpya tua.

23 Uktu bawi hae nynh kae kha

rawsete khua a khanku hae ze heize,

na ryalahtupaw kae tuh

na phungbya hae kha

ka thinlung kya tyty ka nung cih.

24 Na phunglang tuh ka lungrythua zah,

tuanaw hoypaw yn pyatu nynh thua.

25 Ka hiinnaw tuh vuiping kya nynh

a kalouhku vae;

na bya thyhte yn hiinsah thui.

26 Ka cyisahnaw balyn kha he ka ho te,

nang nynh nae leih;

na phungbya hae kha yn ccangpah.

27 Na ccangpyanaw laanpi kha

yn thaethyasah lah,

ngaeangthua lan umpaw

na ryalaw hae kyakhe

ka thinlung kha tyty ka nung cih.

28 Ka ngaethya keiccuze

ka thinlung phe atui;

na bya thyhte thawzung yn pyatua.

29 Akyh leipaw laanpi kha ka kyate

sawsakuh lah, na kawbya kha

thawccinawte yn ccangpya tua.

30 Lungzinaw laanpi kha ka poku vae;

na phungzae hae kha

ka malang ka nungku vae.

31 Pou Bawipaw ,

na phunglang hae kha ka zui;

maethya yn lah nan.

32 Thaethyanaw houhouh nae pya keiccuze,

na kawbya laanpi kyakhe ka ccue.

33 Pou Bawipaw , na phungbya laanpi kha

yn ccangpah lah,

tuh-e tuh athangnaw cia ka zui cih.

34 Na kawbya kha ccykekute

ka thinlung balyn te ka zui nawlan,

thaethyanaw beih yn pya.

35 Na kawbya kyakhe

ka lungry athua keiccuze,

na kawbya laanpi kyakhe

beih yn cciakhae.

36 Ka thinlung te na phunglang kha

yn rysah lah,

karankunaw yn hoisah nan.

37 Ka mit hynh ccungkia leipaw

uccaw yn dosah nan;

na laanpi kyakhe hiinnaw yn pya.

38 Na raw ae rih hae paw hanlan

na raepaw na byakinnaw kha

na ryalahtu ka tungvaw kya ccingsah tua.

39 Na phungzae hae tuh ahoy keiccuze

ka ripaw thethyanaw kyate yn luesah.

40 Dotua, na kawbya hae kha ka ry;

na dingnaw kya yn hiinsah.

41 Pou Bawipaw ,

atynpaw na sungsahnaw tuh

ka tungvaw yn thua sah lah,

na byakinnaw thyhte

na khumnaw mah yn thua sah.

42 Tetuh na bya kha ka doliaku keiccuze,

yn sarya hae paw kha

bya ka khung kho cih hae.

43 Na phungzae kha

ka ngaehoiku keiccuze

byaccingpaw kha ka mung kyate

papin yn lawpah nan.

44 Na kawbya kha zungzae te zungzae cia

po ka zui cih.

45 Na kawbya kha ka ccung vae keiccuze

luenaw kyakhe ka cceih cih.

46 Na kawbya kha siapharan hae malang khe

ka ho cih zah,

ka maethyakhae lan khyh.

47 Na kawbya hae kha ka ry keiccuze

tuh-e kawbya hae kyakhe

ka lungrythua cih.

48 Ka rypaw na kawbya hae kha

saw ka tua zah, na phungbya hae kha

tyty ka tua cih.

49 Na ryalahtupaw hanlan

na bya kha liathuitua,

tuh-e na bya kha nae ngaehoisah vae.

50 Na byakinnaw nynh

hiinnaw yn pya keiccuze

ka vawsawnaw kya zemah

ka ngaengan.

51 A lysakuh hae paw nynh

kae kha myarya yn theihrya hae,

thuasalama na kawbya kyate

ka cceihsei khyh.

52 Pou Bawipaw , langmawlya e

na phungzae hae kha he ka tua tuh,

ngaengannaw ka mue.

53 Na kawbya a vua hae paw

ccungccaw hoylei hae keiccuze

myarya ka thinria.

54 Ka umnaw inn miakaw kya

na phungbya hae tuh

ka hlaw nynh thua hae.

55 Pou Bawipaw , khuazi kya

na min kha ka liathui zah

na kawbya kha ka zui.

56 Na kawbya hae kha ka zui vae keiccuze

e hythuanaw hae hynh ka mue.

57 Bawipaw tuh ka ccou lanpaw

ka hanpaw nynh thua;

na bya kha zui lan bya ka kinku.

58 Ka thinlung balyn te na kya-e

maehoynaw kha kae ngiaku;

na byakinnaw thyhte ka tungvaw

thaw beih yn ccih.

59 Na laanpi kha he ka tua te,

na phunglang kalan

ka maeleihkuh zah ka zui.

60 Na kawbya zui lan

ka rangsakuh zah ka thysung khyh.

61 Ccungccaw hoylei hae paw nynh

mih kaangrui te yn kaesah hae zemah,

na kawbya kha ka ning khyh.

62 Adingpaw na phungzae hae keiccuze

nang kha thehoysah khylan

ziraccyng khe ka tho.

63 Kae tuh na rawrih hae paw balyn te

na kawbya a zui hae paw

mih ruiban nynh ka thua.

64 Pou Bawipaw , laephi tuh

atynpaw na sungsahnaw te phe abeih;

na phungbya hae kha yn ccangpya tua.

65 Pou Bawipaw , na bya thyhte

na ryalahtu tungvaw na hoy.

66 Na kawbya hae kha ka zyn keiccuze

ahoypaw byapiathyanaw te

nythyanaw kha yn ccangpya tua.

67 Vawsawnaw ka tung maw tuh ka cceihsei,

thuasalama atu tuh na bya kha ka zui.

68 Nang tuh na hoy zah

ahoypaw kha na cyi;

na phungbya hae kha yn ccangpya tua.

69 A lysakuh hae paw nynh

hynbya te ka thethya yn ho hae,

thuasalama ka thinlung balyn te

na kawbya kha ka zui.

70 Mih thinlung tuh thaethyanaw

hoi khyh zah a rysaw athah,

thuasalama kae tuh

na kawbya kyakhe ka lungrythua.

71 Na phungbya hae kha

ccangku khylan,

vawsaw ka tungpaw hynh

kamaw hanlan ahoy.

72 Na hopaw kawbya tuh

sui te ngun athong-asan laeze

ka hanlan ahoyhua.

73 Na kuih nynh kae kha yn rae zah,

khyndadyh lan yn nung;

na kawbya hae kha ka ccangku nawlan,

thaethyanaw beih yn pya.

74 Na bya kha ka ngaehoi vae keiccuze

na rawrih hae paw nynh

yn muih cih hae zah

mih lungtua cih.

75 Pou Bawipaw , na byapianaw tuh

akyh cipaw ka nyh zah,

na lungzinaw keiccuze vawsawnaw

nae tungsah vae cipaw ka ny.

76 Na ryalahtu tungvaw bya na kinku thyhte,

atynpaw na sungsahnaw tuh

ka ngaengannaw lang tang vae sah.

77 Na kawbya tuh

ka lungrythuakhaeku keiccuze

ka hiin nawlan thaw yn ccitua.

78 A lysakuh hae paw nynh

hynthyanaw te yn ro vae hae keiccuze

maethyanaw mue hae sah;

kae tuh na kawbya kyakhe

ka ohleihkuh cih.

79 Na rawrih hae paw nynh

na phunglang kha a ny nawlan hae,

ka kalan oun maeleihkuh hae sah.

80 Maethya ka bongku khyh nawlan,

ka thinlung tuh na phungbya kya

ccaenaw um leipaw thua vae sah.

81 Ka muisaw tuh na khumnaw

a ngawnaw kya a thawthang;

na bya kha ka ngaehoiku.

82 Na byakinpyakupaw kha

ka dokhawnaw ze ka mit phe ccih vae;

"Hohtuhmou ngaengannaw

nae pya cih?" cite ka khia.

83 Kae tuh maeekhuh kya umpaw

savingtui-um hawte nynh ka thua vae,

tuhzemah na phungbya kha

ka ning loh khyh.

84 Hohsemou na ryalahtupaw nynh

ka ngaesang ung cih?

Vawsaw yn pya hae paw hynh

hohtuhmou bya na pia cih hae?

85 A lysakuh hae paw nynh

hunghua yn thaekhaw vae hae;

minmin nynh na kawbya kha

a rawse hae.

86 Na kawbya balyn tuh atyn;

akonglang um leite vawsaw yn pya hae;

beih yn bawmtua!

87 Minmin nynh laephi vawlan te

vyavya yn zosah vae hae;

thuasalama na kawbya hae kha

ka vua khyh.

88 Na hopaw phunglang hae kha

ka zui ccaw hae,

atynpaw na sungsahnaw te

ka hiinnaw hynh beih yn haang.

89 Bawipaw tuh zungzae atyn;

na bya tuh vaawram kya

tynkaring lan a um.

90 Na lungzinaw tuh

she takyh kya atyn;

laephi kha na tynsah zah,

tynkaring lan a um.

91 Atyn-are tuh na ryalahtu hae

athua keiccuze kaw na pya thyhte

atunin cia atyn hae.

92 Na kawbya hynh

ka lungry a la thua khyh lanze,

vawsaw ka teingnaw kya

phe ka la chih vae cih.

93 Na kawbya hae kha

papin ka ning lan khyh,

pawccecize e na kawbya hae liate

hiinnaw nae pya.

94 Kae tuh na kya-e nynh ka thua;

beih yn khumtua,

pawccecize na kawbya hae kha

ka ccung zah ka zui vae.

95 Ccungccaw hoylei hae paw nynh

chia khylan yn buhkhaw hae,

thuasalama na phunglang kha ka tua.

96 Pawpaw mah accingpaw um khyh

cipaw ka ny vae,

thuasalama na kawbya tuh

myaryamaw ako.

97 Na kawbya hynh

pawcih baban mou ka ry!

E kyahin anin ninlang ka tua.

98 Na kawbya nynh zungzae

yn umkhae keiccuze

ka rhaw hae laeze yn hawsah hua.

99 Na phunglang hae kha

tyty ka tua keiccuze

ka sazae hae balyn laeze

ka nyhthyahua.

100 Na kawbya kha ka zui keiccuze

akum tang hae paw laeze

ka nyhthyahua.

101 Na bya kha zui khylan

ahoy leipaw laanpi miakaw kha ka sibia.

102 Nae ccangpya vae keiccuze

na phungzae hae kyate

ccanglang ka maekuh khyh.

103 Na bya tuh ka taangtua zah

pawcih baban mou a e,

ka khalang kya khoilutui laeze a ehua.

104 Na kawbya liate nythyanaw ka mue;

tukeiccuze ahme leipaw

laanpi miakaw kha ka hua.

105 Na bya tuh ka ccu hanlan

maeekhua thua zah,

ka laanpi hanlan awnaw nynh thua.

106 Adingpaw na phungzae kha

zui khylan bya ka kinkuh vae zah

ka tynsah vae.

107 Pou Bawipaw , ka teingnaw tuh

myaryamaw accih;

na bya thyhte beih yn hiin sah.

108 Pou Bawipaw , the kae hoysahnawpaw

silawkunawpaw hynh

beih yn ccoupah lah,

na phungzae kha yn ccangpya tua.

109 Ka hiinnaw tuh ka kuih kya nynh tyty a um,

thuasalama na kawbya kha ka ning khyh.

110 Ccungccaw hoylei hae paw nynh

kaang yn syakhaw hae,

thuasalama na kawbya kyate

ccanglang ka cceihsei khyh.

111 Na phunglang hae tuh

zungzae ka rho thua zah,

ka thinlung a lungtuanawpaw nynh thua.

112 Na phungbya hae kha

athangnaw cia zungzae zui khylan

ka thinlung kya bya ka paeku vae.

113 Thinlung apheipaw kha ka hua,

thuasalama na kawbya kha ka ry.

114 Nang tuh ka rekunaw hmin te

ka khawriaphua nynh na thua;

na bya kha ka ngaehoi.

115 Hoyleinaw a rae hae paw nanning,

ka Pachia kawbya kha ka zui nawlan,

ka kyate asawkunaw lang cceih oh.

116 Ka hiin nawlan,

na byakinnaw thyhte yn bawmtua,

ka ngaehoinaw kya

maethyanaw yn muesah nan.

117 Ka khyn nawlan te

na phungbya hae kha

tyty ka peki nawlan,

phang yn kyngtua.

118 Na phungbya zui leite

a cceihseipaw balyn kha na vua hae;

pawccecize mih thyaruhnaw tuh

accakaepaw nynh thua.

119 Laephi vawlan e

ccungccaw hoyleipaw balyn hynh

athupaw lang nynh na ria hae;

tukeiccuze na phunglang hae kha ka ry.

120 Na raw ka ri keiccuze ka thyngkuh,

na byapianaw kha ka rih.

121 Ahmepaw te akyhpaw kha ka cyi vae;

yn tuaa yn sah hae paw kyakhe

yn nungsya nan.

122 Na ryalahtupaw ka hoynaw hanlan

bya yn kinpyaku tua;

a lysakuh hae paw nynh

vawsawnaw yn pya nan hae sah.

123 Na khumnaw te adingpaw

na byakin accingnaw kha

ka donaw ze ka mit phe ccih vae.

124 Atynpaw na sungsahnaw thyhte

na ryalahtu hynh yn ccuepe lah,

na phungbya hae kha yn ccangpah.

125 Kae tuh na ryalahtu nynh ka thua;

na phunglang hae kha ka ny nawlan,

nythyanaw beih yn pya.

126 Na kawbya kha a vua vae hae keiccuze

atu hynh Bawipaw hanlan

ryalaw ccyh nynh athua vae.

127 Thanccingte, na kawbya hae kha

sui laeze ka ryhua zah,

sui hoypaw laeze mah ka ryhua.

128 Tukeiccuze na kawbya balyn kha ka zui zah,

ahme leipaw laanpi miakaw kha ka hua.

129 Na phunglang hae tuh

ngaeangthua lan a um;

tukeiccuze ka hiinnaw nynh

khah-e phunglang hae kha a zui.

130 Na kawbya kha ccaerarih lan

phynaw nynh awnaw kha a pya;

tuh-e nynh tuanaw a zya hae paw kha

nythyanaw a pya hae.

131 Na kawbya kha eih ka ry keiccuze

ka khalang ka aw zah ka hy phe law.

132 Na min a ry hae paw kha

thaw leih na cci hae hawte,

ka kalan yn hawi lah, thaw beih yn ccitua.

133 Bya nae kinpyaku thyhte

ka laan ka sui yn uasahpah lah,

hoyleinaw nynh kae kha

papin yn uk nan sah.

134 Na kawbya hae kha

ka zui kho nawlan,

ccungccaw tuaasahnaw kyate

yn shawkhawtua.

135 Na ryalahtupaw tungvaw kya

na mitmae kha awsah lah,

na phungbya hae kha yn ccangpya tua.

136 Na kawbya kha a zui khyh keiccu hae ze,

ka mit kyate mitphi tuh vaw hawte alua.

137 Pou Bawipaw , nang tuh na ding zah,

na byapianaw tuh ahme.

138 Nae pyapaw na phunglang hae tuh

a dingpaw te a lungzipaw nynh thua.

139 Ka rhaw hae nynh na bya kha

a ning hae keiccuze

ka thinrianaw nynh maee hawte yn u.

140 Na byakin tuh hoyte syntawtua thua zah,

na ryalahtu kae nynh khah-e kha ka ry.

141 Kae tuh a nyaapaw te

a dothatheih hae paw nynh ka thua,

tuhzemah na kawbya hae kha

ka ning khyh.

142 Na dingnaw tuh zungzae tynpaw

dingnaw thua zah,

na kawbya tuh byaccing nynh thua.

143 Vawsawnaw te lungriathaenaw nynh

ka tungvaw yn thuanua vae,

thuasalama na kawbya hae tuh

ka lungrypaw nynh thua.

144 Na phunglang hae tuh zungzae ading;

nythyanaw kha beih yn pya lah, ka hiin cih.

145 Ka thinlung balyn te ka sia;

Pou Bawipaw , beih yn leihtua.

Na phungbya hae kha ka zui cih.

146 Na kalan khe ka sia;

na phunglang hae kha ka zui nawlan,

beih yn khumtua.

147 Khua adae mawte ka tho zah,

bawmnaw mue khylan ka sia;

na bya kha ka ngaehoiku.

148 Na byakinpyanaw kha tuate

zidae ka mit masi leite po ka hah.

149 Atynpaw na sungsahnaw liate

ka roi beih yn thaepah;

Pou Bawipaw , na byading liate

ka hiinnaw beih yn haang.

150 Ahoy leipaw eenaw hoite

vawsaw yn pya hae paw nynh

ka kalan oun naeku hae,

minmin tuh na kawbya te a sawkuh hae.

151 Tuhzemah pou Bawipaw ,

nang tuh ka pe na um,

na kawbya balyn tuh akyh.

152 Na phunglang hae kha

zungzae na tynsah vae cipaw tuh

langmawlya mawte ka la ny vae.

153 Ka riathaenaw hynh yn do lah,

yn luesah tua,

pawccecize na kawbya kha ka ning khyh.

154 Ka tungpaw bya te than kyahin

yn pankhaw lah, yn shawkhawtua;

na byakinnaw thyhte beih yn hiinsah.

155 Khumnaw tuh

ccungccaw hoylei hae paw kyate a sawkuh,

pawccecize na phungbya kha

ccung khyh hae.

156 Pou Bawipaw , na thawccinaw tuh

myarya ale; na byading thyhte

hiinnaw beih yn pya.

157 Yn tuaa yn sah hae paw te

ka rhaw hae tuh myarya alung hae,

tuhzemah na phunglang kyate

ka maekuh khyh.

158 Mih lungzi lei hae paw kha

ka do hae zah ka luathua,

pawccecize na kawbya kha

zui khyh hae.

159 Na kawbya kha pawcih baban mou

ka ry cipaw tuatua;

atynpaw na sungsahnaw thyhte

ka hiinnaw hynh beih yn haang.

160 Na bya hynh abalyn mawte

byaccing nynh thua;

adingpaw na phungzae ccangkheit cci tuh

zungzae atyn.

161 Uktu bawi hae nynh akonglang um leite

yn tuaa yn sah hae,

thuasalama ka thinlung tuh na bya kha a rih.

162 Aphutepaw sisua patae

a muihkuhpaw hawte

na bya kyakhe ka lungtua.

163 Hynbya kha ka hua zah ka luathua,

thuasalama na kawbya kha ka ry.

164 Adingpaw na phungzae hae keiccuze

nin kheit ze vae sari kae thehoysah.

165 Na kawbya a ry hae paw tuh

myarya lepaw daenaw a hoi hae;

pawpaw nynh mah minmin kha

khulia kho khyh hae.

166 Pou Bawipaw , na khumnaw kha

ka ngaehoikuh zah,

na kawbya hae kha ka zui.

167 Ka hiinnaw nynh

na phunglang hae kha a zui;

khah-e phunglang hae kha

myaryamaw ka ry.

168 Na kawbya hae te

na phunglang hae kha ka zui,

pawccecize ka hiinzia balyn kha

phe na muih.

169 Pou Bawipaw , ka siaruanaw hynh

na kya thua vae sah;

na bya thyhte nythyanaw beih yn pya.

170 Kae ngianaw hynh na kya thua vae sah;

bya na kinpyaku thyhte yn luesah tua.

171 Na phungbya hae kha

nae ccangpya keiccuze

ka mung nynh thehoysahnaw

bya kha a ho cih.

172 Na kawbya balyn tuh akyh keiccuze

ka mung ka lae nynh

na byakinkunaw kha

hlaw te a sah cih.

173 Na kawbya hae kha

ka poku vae keiccuze

na kuih tuh kae kha bawm khylan

paccynkute um sah.

174 Pou Bawipaw , na khumnaw kha

myarya ka ry,

na kawbya tuh ka lungrypaw nynh thua.

175 Nang kha the kae hoysah kho nawlan,

hiinnaw beih yn pyatua,

na phungzae hae nynh kae kha

yn bawm hae sah.

176 Tuu azopaw hawte ka cceihsei vae;

na ryalahtupaw hynh beih yn ccung,

pawccecize na kawbya kha

ka ning khyh.