1 Pou Bawipaw , kae yn rawse hae paw kha rawse hae;

kae kha rawsete rhaw yn tuk hae paw kha tuktua hae!

2 Khawriaphua te rhawtuknawpaw

zunghe kha lawkuh lah,

kae kha bawm khylan thoku tua!

3 Kae yn deehui hae paw kha rawsete

ccoi kha thuaanuakuh hae.

"Kae tuh nang ae khumtu nynh ka thua,"

cite ka muisaw kha hopya tua.

4 Ka hiinnaw yn hawkuh hae paw tuh

maethyanaw te thethyanaw mue hae sah.

Ka tungvaw hoyleinaw

yn paccynnuakuh hae paw tuh

mih lungmua sah lah, ki hae sah.

5 Bawipaw vaaw ccungccapaw nynh

minmin kha dee hae sah,

khisan nynh a mung hae paw

vaekang hawte thua hae sah.

6 Bawipaw vaaw ccungccapaw nynh

minmin kha dee hae sah,

mih laanpi tuh moh sah lah,

nawpalaepaw laanpi lang tang sah.

7 Pawccecize akonglang um leite

kaang yn syakhaw hae zah,

akonglang um leite

ka hiinnaw chia khylan

akhupaw hunghua kha

yn thaekhaw hae.

8 Ronaw nynh minmin kha

tualeipite thuanua hae sah.

Te mimaw nynh a sya hae paw

kaang kyakhe kae hae sah;

mimaw ronaw hunghu

a lungkhu lang ccah hae sah.

9 Tetuh ka muisaw tuh

Bawipaw kya a lungtua cih,

yn luesah keiccuze ka lungpaw cih.

10 Ka ru ka khua hae balyn nynh,

"Pou Bawipaw , nang ae lopaw hummou a um?

Anyaa hae paw kha athung hae paw kyate

na luesah hae,

ryachi hae te anyaa hae paw kha

luade a mang hae paw kyate

na luesah hae," cite a ho cih hae.

11 Ahme leipaw ccaekia hae nynh

yn thokuh hae zah,

ka ny leipaw uccaw kong kha

yn khia hae.

12 Minmin nynh ahoypaw kha

athahpaw te yn liaru hae zah,

ka lung phe thang.

13 Thuasalama minmin tuh

a cci vae hae ze,

ngaethyanaw buriboei ka lawkuh zah,

kamaw te kamaw taeekute

looh-ae ka sung.

Ka by vawlan ka lu bakhungte

saw ka sang,

14 ka ban hae te ka uno hae hanlan

ka ngaethya hawte ka ngae athah;

lukhakheit nynh a nung elang

a raw a khui hawte,

ka bakhung zah rawkhuite ka um.

15 Thuasalama kae nynh he ka khuliakuh tuh,

lungpawte a sueluakuh hae,

kae kha rawsete a sueluakuh hae;

ka ny lei hae paw a puatho hae paw nynh

kae kha umtaw leite yn zia hae;

16 kae kha houhouh yn sarya hae zah,

mih haw kha yn zynua hae.

17 Pou Bawipaw , hohseciamou

phang nae do ung cih?

Minmin nynh rokunaw kyate

yn luesah lah,

ka hiinnaw kha chindeih hae kyate

yn luesah!

18 Tetuh a pumkuh hae paw

pataepi kyakhe kae thehoysah cih;

ccungccaw pataepi kyakhe

kae thehoysah cih.

19 Ahynhupaw ka rhaw hae tuh

ka tungvaw mih lungtua nan sah,

kae yn hua hae paw tuh

akonglang um leite

mih mit masipakuh nan hae sah.✝

20 Pawccecize daenaw byaho leite,

ram lungkhu kya daebabi lan

um hae paw kha rawsete

hynhupaw bya kha ho lan

a paccynku hae.

21 Mih khalang kha yn awnua hae zah,

"Alei, Alei, na cyipaw kha

kae mit te phe kae muih vae," a ci hae.

22 Pou Bawipaw , phe na muih vae,

daebabi lan um nan!

Pou Bawipaw , ka kyate beih sawkuh nan!

23 Thotua! Kae hynh thungkhaw khylan

namaw te namaw lungthosaku tua,

ka Pachia te ka Bawipaw ,

ka hanlan yn cyipya tua!

24 Pou Bawipaw ka Pachia,

nang tuh adingpaw na thua thyhawte,

seinaw a hoi leipaw nynh thua cite

bya beih yn piatua,

minmin tuh ka tungvaw

mih lungtua nan sah.

25 Mimaw te mimaw kha,

"Alei, kae lungry phe ccing vae,"

cite hokuh nan hae sah.

Minmin nynh, "Nang kha

phe kae laang vae," cite

ho nan hae sah.

26 Hoyleinaw ka tung lyaze

mih lungtuapaw balyn tuh

maethyanaw mue hae sah lah,

mih lungmua sah;

kae kha rawsete mimaw te mimaw

a hangsakuh hae paw tuh

maethyanaw te thethyanaw kha

mue hae sah.

27 Seinaw ka hoi leinaw kha

a ry hae paw tuh

lungtuate sia hae sah lah,

mih lungpaw sah,

"A ryalahtu hae hoynaw kha

a lungrythuapaw

Bawipaw tuh alesae,"

cite palei ho hae sah.

28 Oute ka munglae nynh

na dingnaw kha a ho cih zah,

anin ninlang kae thehoysah cih.