1 Pachia tuh Israel hae hanlan te

thinlung athyaa hae paw hanlan

ahoy ccaccing.

2 Thuasalama kae tuh vya ka khuliakuh;

vya ka thei.

3 Pawccecize ccungccaw hoylei hae paw

kya-e hoirumnaw kha he ka muih tuh,

a lysakuhpaw tungvaw ka eiung.

4 Minmin tuh ccinaw hoi khyh hae;

mih pyn tuh mih ngedan zah

mih ngesaw ahoy.

5 Ming hae hawte

vawsawnaw tung khyh hae;

ming hae hawte

teingnaw mue khyh hae.

6 Tukeiccuze lysakunaw kha

si lang oikuh hae zah,

puathonaw kha boeining hawte

a bongku hae.

7 Eih tho hae keiccuze mih mit tuh

phang phinkhaekuh;

mih thinlung tuh

ngaeenaw te phe abeih.

8 Ming hae kha sarya hae zah

ahoy leipaw bya kha a hoku hae;

lysakute vawsaw pyanaw bya khate

a hu a raw hae.

9 Vaawlang rawsenaw bya kha ho hae zah,

mih lae tuh laephi vawlan a khiakuh.

10 Tukeiccuze Pachia ccungccaw hae nynh

maeleihkuh hae zah,

minmin kha the a hoysah hae.

11 Te minmin nynh, "Pachia nynh

pawtemou a nyh kho cih?

Ahang Huaccepaw kya nythyanaw

a um zawtou?" a ci hae.

12 Tuhcihawpaw hae tuh

ccungccaw hoylei hae paw nynh thua;

hiinhoyte zungzae um hae zah,

houhouh a hoirum hae.

13 Ka thinlung ka thyaasakuh zah,

ka kuih kha seinaw hoi lei lante

ka singkupaw balyn hynh

alakawpaw nynh thua.

14 Anin ninlang vawsaw nae teingsah zah,

awkhua takyh de nae tah.

15 Tuhcihtuhte ka la ho lanze,

na ccungccaw hae kya

ahme leipaw ka thua cih.

16 E hynh pawtemou thaethya lan cite

he ka tua tuh,

ka hanlan myarya arupaw rya nynh alo,

17 Pachia beikinnthyaa lungkhu lang

ka tee koute tuh,

ccungccaw hoylei hae paw

mih thangnaw kha ka muih.

18 Minmin kha nawpalaepaw hmin kya

na nung hae;

ronaw kya na khulia hae.

19 Minmin tuh sosoh kyakhe roh hae zah,

myarya lepaw rikawnaw keiccuze

khaleih a zo hae.

20 Minmin tuh lukhakheit nynh

he a thaekuh te phe azopaw maan te

nynh a loku hae;

he na thaesakuh hae tuh,

mih tuakunaw kha phe azo vae.

21 Ka lungroh zah,

ka thinlung he ccih tuh,

22 baluh ka ngaee zah pawpaw mah

ka tuathya vae khyh;

na malang arepaw loramsaw nynh

ka lo vae.

23 Tuhzemah namaw kyakhe

po ka um zah,

ka ranglang kuih kha phang nae kyng.

24 Tuanaw pyate laan nae mawpah zah,

athangnaw kya tuh sawtuanaw te

nae ccou cih.

25 Vaawlang khua kya nang holeite

hummou ka hoi?

Namaw laelan laephi vawlan

ka rypaw pawpaw mah

um vae khyh.

26 Ka pyn te ka thinlung tuh

nyaabung hae salamah,

Pachia tuh ka thinlung thawzung te

ka ccoupaw ka hanpaw nynh

athua zungzae.

27 Nang te a sawkuh hae paw tuh

a roh cih hae;

na tungvaw a mesei hae paw kha

na maemih hae.

28 Thuasalama kae ka hanlan tuh

Pachia kalan naekupaw hynh ahoy;

na ryalaw balyn kha ho khylan,

Bawipaw PACHIA kha

ka khynnaw lang ka nungku vae.