1 Kaening hanlan thua leite, pou Bawipaw ,

kaening hanlan thua leite,

atynpaw na sungsahnaw te

na lungzinaw keiccuze

na min phu-e pya nawlan thua vae sah.

2 "Mih Pachia tuh teimou a um?" cite

minphuin ccangpaw hae nynh

pawccemou a ho cih hae?

3 Ah Pachia tuh vaawram kya a um;

a lungry thyhte a cyi.

4 Mih zohtuh hae tuh sui te

ngun thua zah, ccungccaw kuih te

raepaw nynh athua hae.✝

5 Tuh-e zohtuh hae tuh

mung hoi hae salamah,

byaho kho khyh hae;

mit hoi hae salamah ngawmuih khyh hae.

6 Nakaring hoi hae salamah

nawthae khyh hae;

naduh hoi hae salamah

amyn thae khyh hae.

7 Kuih hoi hae salamah haethya khyh hae;

ccu hoi hae salamah

cceihthya khyh hae;

mih lohtharue te roi pousathya khyh hae.

8 E zohtuh a raetu hae hynh

zohtuh hae mawte nynh a loku hae;

e zohtuh hae a doliakuhpaw balyn tuh

tuhcite nynh athua hae.

9 Pou Israel, Bawipaw kha doliakuh!

Aning tuh minmin bawmtu te

thungkhawtu nynh thua.

10 Pou Aaron ciihan hae,

Bawipaw kha doliakuh oh!

Aning tuh minmin bawmtu te

thungkhawtu nynh thua.

11 Bawipaw rawrih hae paw nanning,

Bawipaw kha doliakuh oh!

Aning tuh minmin bawmtu te

thungkhawtu nynh thua.

12 Bawipaw nynh aening kha

oun ning khyh zah, hythua oun pya cih;

Israel ciihan kha hythua a pya cih;

Aaron ciihan kha hythua a pya cih;

13 Bawipaw rawrih hae paw adih ale kha

hythua a pya cih hae.✝

14 Bawipaw nynh nanning te

nae ccaaw hae kha

pungzaenaw ae pya vae oh sah.

15 Vaaw te lae a raetu Bawipaw nynh

hythua ae pya vae oh sah.

16 Vaawlui tuh Bawipaw vaawlui nynh thua,

thuasalama laephi tuh

ccungccaw hae kalan a pya vae.

17 Michi hae, daenaw kalan

a rungbung hae paw miakaw tuh

Bawipaw kha thehoysah khyh hae.

18 Thuasalama aening nynh

Bawipaw kha atu te zungzae cia

the ah hoysah cih oh.

Bawipaw kha thehoysah oh!