1 Pou ka ccungccaw hae,

ka ccangpyanaw hynh ngaetua oh;

ka hopaw bya kalan hin

nae nakaring kha oun tuaku tua oh.

2 Tousenaw phungpaw kha ka ho cih zah,

langmawlya e byakhupaw kha ka ho cih,✝

3 tuh-e tuh ah minpaaw hae nynh

aening oun hopya hae paw,

ah thae vae oh paw te

ah ny vae oh paw kha nynh thua.

4 Tuh-e bya hae tuh ah ccaaw hae kha

thuruhpya lei lan hae;

Bawipaw kya-e alesaepaw

ryalaw hae,

a thawzung te a la cyipaw

ngaeangnaw hae kha

yn thua cih paw she e

ccungccaw hae kya hopya lan hae.

5 Jakob ciihan kya

phunglang kha tynsah zah,

Israel hae kya upadi kha a nung,

tuh-e tuh mih ccaaw hae kya

ccangpya khylan ah minpaaw hae kha

kaw a la pya hae paw nynh thua.

6 Tuhcite a pui loh lei hae paw

malang she e mih ccaaw hae nynh

a nyhbua cih hae, minmin tuh

oun lethung cih hae zah,

mih ccaaw hae kha

a hopah pathy cih hae,

7 tuhteze nynh Pachia kha

a ngaehoikuh cih hae zah,

Pachia ryalaw kha ning leite

a kawbya kha a zui cih hae.

8 Minmin tuh mih minpaaw hae te

lokuh lan khyh hae,

mih minpaaw hae tuh

alungkhungpaw te

rawse a mang hae paw phin,

thinlung atyn lei hae paw phin,

Pachia tungvaw lungzinaw

a hoi lei hae paw nynh thua hae.

9 The te li a mang hae paw

Efraim phin hae tuh

rhawtuk nin kya vae tuh

nulang a ki hae.

10 Minmin nynh Pachia byakin kha

zui khyh hae,

a upadi thyhte zui lan a ei hae.

11 A la cyipaw te a langsapyakuh hae paw

ngaeangnaw hae kha minmin nynh

phe a ning hae.

12 Izip ram, Zoan bialae kya,

mih minpaaw hae muihnaw kyakhe

ngaeangnaw hae kha a rae.✝

13 Rili kha thoh phiasakuh zah,

minmin kha po a zuasah hae,

te tui kha pang hawte a thadynsah.✝

14 Khuadae ccyh kya maeking te

cciakhae hae zah, khuazi zidae

maee awpaw te a cciakhae hae.✝

15 Ramkaw kya lungpi hae kha koi zah,

rili kya-e tui hawkhate minmin kha

a niasah hae.✝

16 Lungpi kyate vaw hae kha pousah zah,

tui kha vawpi hae hawte a luasah hae.

17 Tuhzemah ramkaw kya

Ahang Huaccepaw kha rawsete

minmin nynh houh a sei ung hae.

18 A ry hae paw looh kha ngiakute

mih thinlung kya Pachia kha

a syntawtua hae.✝

19 Minmin nynh Pachia kha rawsete,

"Pachia nynh ramkaw kya

ccaboi kha phae kho vema?

20 Tui a pou ccaw cite lungpi kha

bua zah, tui tuh a pou,

sanlou so yn pya kho vema?

a ccungccaw hae elang saw so

oun khangpah kho vema?"

cite a ho hae.

21 Bawipaw nynh tuh-e bya

he a thae te, a thin myarya ria;

Jakob ciihan tungvaw maeerua zah,

Israel tungvaw a thinrianaw tuh

alethung,

22 pawccecize Pachia kha

zyn khyh hae zah,

a khumnaw huhan kha

doliakuh khyh hae.

23 Tuhzemah aning nynh ahangnaw

vaawlui kha kawpya zah,

vaawlang thuakaw kha a hung;

24 a ae lan hae cite manna sanlou kha

khuaa lang rawsah zah,

vaawlang looh kha a pya hae.✝

25 Ccungccaw hae nynh

vaawccungccaw hae sanlou kha a ae hae;

Pachia nynh minmin kha

looh patae a pya hae.

26 Vaawlui khe nithua lang e

khisan kha zawsah zah,

a huhan te alia lang e khisan kha

a zawsah;

27 saw kha vuiping hawte,

azouthyapaw pavaw hae kha

rili laesia zeihte khuaa lang

a rawsahpya hae,

28 tuh-e tuh mih ryahmin lungkhu,

a umnaw hae pepan balyn khe a ccawsah.

29 Tuhcite minmin a ry zeih hae te,

aning nynh a pya hae keiccuze

minmin nynh phe byn lan a ae hae.

30 Thuasalama minmin nynh

a byn maw hae,

looh a ae cciamang lya hae khe,

31 Pachia thinrianaw tuh mih tungvaw

yn ccah zah, minmin kyaze

a thunghua hae paw kha theih hae zah,

Israel ccangvae hae kha a khulia hae.

32 Israel hae nynh hynh-e balyn hynh

a tung hae zemah a sei mamin hae;

ngaeangthua lan umpaw

a ryalaw hae kha minmin nynh

zyn khyh hae.

33 Tukeiccuze mih nin tuh hy hawte

thangsah han zah,

mih kum tuh myarya

ri lan umpaw kyakhe a nung.

34 Aning nynh minmin kha

he a theih hae te,

amaw kha a ccung hae;

minmin nynh ngaesikuh hae zah

Pachia kha thawte a ccung hae.

35 Pachia tuh kae lungpi thua zah,

kaening oun shawkhawtu

Ahang Huaccepaw Pachia nynh thua

cipaw oun liathui hae.

36 Thuasalama mih khalang te amaw kha

nawpalya lan poo hae zah,

mih munglae te a ling hae.

37 Mih thinlung tuh amaw kya tyn khyh;

a byakinnaw kya mih lungzi khyh.

38 Tuhzemah aning tuh thawccinaw a hoi,

mih hoyleinaw kha ngaethya hae zah,

minmin kha roh khyh hae;

a thinrianaw kha atu te atu yhkuh zah,

a thinrianaw balyn kha

pousah leite a synku.

39 Minmin tuh pynsaw sasaw thua hae zah,

a zaw koute a kithui lei vae paw

khisan hawte nynh athua hae

cipaw a liathui.

40 Minmin nynh amaw kha ramkaw kya

atu te atu dou hae zah,

laesia ram kya a ngae a thyasah hae!

41 Pachia kha atu te atu

syntawtua hae zah,

Israel Pachia Athyaapaw kha

a thinriasah hae.

42 Amaw huhan kha thuasah,

rhaw hae kyate a shawkhaw hae

nin kha thuasah ccykekuh khyh hae;

43 Izip ram kya muihsahnaw hae te

Zoan bialae kya ngaeangnaw

a langsapyaku hae paw kha mah

phe ning hae.

44 Mih vawkhu hae kha a nia kho

khyh ccaw hae cite

chiise lang a tangsah.✝

45 Minmin a bou hae paw

kaekih hae kha thuasah,

minmin a roh hae paw buphaw hae kha

thuasah a sawnua hae.✝

46 Mih ccathae hae kha

maccaloih hae kalan thuasah,

mih ryalaw mee kha

tungkhipaw hae kalan thuasah a pya hae.✝

47 Mih misu ku hae kha hya te roh zah,

mih eboh ku hae kha dangtui te a ro.✝

48 Mih vaetua hae kha hya te theih zah,

mih tuuphu hae kha ria te a chia.

49 Mih tungvaw khe ri lan umpaw

a thinrianaw, a thin-unaw,

a bungpawnaw te a riathaenaw,

ro a mang hae paw vaawccungccaw

phu hae kha a sawnua hae.

50 A thinrianaw kha yhku leite,

mih hiinnaw kha haang khyh hae,

shethya te phe chia hae.

51 Izip ram kya ccatawccaw balyn kha thuasah,

Ham ccungccaw hae innbyn raveih kya-e

ccatawccaw pise miakaw kha thuasah

a chia hae.✝

52 Te a ccungccaw hae kha

tuu hae hawte cciakhae hae zah,

tuuphu hawte ramkaw kya

laan a mawpya hae.✝

53 Minmin kha khyndadyh lan

cciakhae hae zah

minmin tuh rih khyh hae;

mih rhaw hae kha tuh rili nynh

pong a vu hae.✝

54 Te minmin kha

a ram thyaapaw kalan khe thuasah,

a ranglang kuih te a tae vae paw

mua langkhe thuasah a cciakhae hae.

55 Mih malang te minphuin hae kha

a dee hae; ram kha

Israel minphuin hae kalan nee hae zah,

tuin kya mih bu kyakhe

khua a sah hae.✝

56 Tuhzemah minmin nynh

Ahang Huaccepaw Pachia kha

syntawtua hae zah a rawse hae.

A phunglang kha zui khyh hae,✝

57 mih minpaaw hae hawte

maeleihkuh hae zah mih lungzi khyh;

akoupaw li hawte a cceihsei hae.

58 Minmin nynh mih khozi beiknaw

hmin kha raete Pachia kha a thinriasah hae;

mih zohtuh hae khate amaw kha

eiungnaw a hoisah hae.

59 Pachia nynh he a thae te,

myaryamaw a thinria zah,

Israel kha ccaring a vua.

60 Aning nynh ccungccaw hae kya

a la umnaw bu

Shiloh khua kha a cciataw,✝

61 te a huhan kha rhaw hae kyngsah hae zah,

a phu-enaw kha rhaw hae kuih kya

a pya hae.✝

62 A ccungccaw hae kha thaloi te

chisah hae zah a rho tungvaw a thinria.

63 Mih ccangvae hae tuh

rhawtuknaw kya chih hae zah,

mih liaccaw hae elang vawpaw lanpaw

lu kheit san um vae khyh.

64 Mih ranpibawi hae tuh thaloi te

chih hae zah,

mih nomae hae nynh rawkhuinaw kha

rae vae khyh hae.

65 Tetuh Bawipaw tuh inaw kyate

a thopaw hawte yn tho,

misutui keiccuze

a rawhoypaw hawte yn tho.

66 A rhaw hae kha phe tae dadi hae zah,

maethyate zungzae a nung hae.

67 Josef ciihan kha vua zah,

Efraim phin kha po khyh;

68 Judah phin te a sungsahpaw

Zion Mua kha a po.

69 A beikinnthyaa kha ahangpaw

vaawlui hawte sak zah,

zungzae atyn lan a raepaw

laephi hawte a sak.

70 A ryalahtu David kha po zah,

tuukhia kya-e kha a ko;✝

71 a ccungccaw athuapaw Jakob,

amaw rho athuapaw

Israel hae tuurinpaw thua khylan,

a taw hae a do-oihpaw tuupinung hae

a rinnaw kyakhate David kha a po.

72 David nynh dingnaw thinlung khate

minmin kha do-oih hae zah,

hawnaw kuih khate laan a mawpya hae.