1 Bawipaw tuh ahoy keiccuze

amaw kalan lungtuabya ho oh;

pawccecize atynpaw a sungsahnaw tuh

zungzae atyn.✝

2,3 Vawsawnaw kyate khum thua hae zah,

nithua, niccaw, thahlang, deilang umpaw

ram hae kyate a suelua hae paw,

Bawipaw nynh a khum hae paw kha nynh

tuh-e bya tuh buabua ho hae sah.

4 Ccungccaw abang tuh umnaw lanpaw

khua kalan a cceihpaw

laanpi kha muihku leite,

ccungccaw um leinaw laesia ram kyakhe

a khiavuikuh hae;

5 mih vuelaw, mih tuihaw zah,

mih lungthaw athang.

6 Tetuh mih vawsawnaw kyate

Bawipaw kalan sia hae zah,

aning nynh mih riathaenaw kyate a luesah hae;

7 a um nawlan hae paw khua kya

a thua mawlaezung hae,

alawpaw laanpi kyate a cciakhae hae.

8 Atynpaw a sungsahnaw te

ccungccaw hae kya

a raepaw ngaeangnaw hae keiccuze

minmin nynh Bawipaw kalan

lungtuabya ho hae sah.

9 Pawccecize tui a hawpaw kha

a tuihawkesah hae zah,

a vuelawpaw kha ahoypaw uccaw te

a vue a sosah.

10 Ccungccaw abang tuh ngaethyate

mohnaw kya a haung hae,

vawsaw teingte sivawrui te hekute

thongccah hae paw a um,

11 pawccecize minmin nynh Pachia bya kha

rawsete dou hae zah,

Ahang Huaccepaw kya-e tuanaw

pyakunaw kha pawlangria khyh hae.

12 Ryalaw arupaw khate

mih lung a thangsah hae,

khuliakuh hae zah, a thotu te

a bawmtu lu kheit san um khyh.

13 Tetuh mih vawsawnaw kyate

Bawipaw kalan sia hae zah,

aning nynh mih riathaenaw kyate a khum hae;

14 mohnaw te lungthangnaw kyate

minmin kha poh thuaa hae zah,

a heenaw hae paw kha a paepya hae.

15 Atynpaw a sungsahnaw te

ccungccaw hae kya

a raepaw ngaeangnaw hae keiccuze

Bawipaw kalan lungtuabya ho hae sah.

16 Pawccecize sohin thuakaw kha khya zah,

sivaccaw hae kha

ccangning lang a khya hae.

17 Abang tuh seinaw laanpi

a zuinaw hae kya a ngaeekhaekuh hae,

mih hoyleinaw keiccuze

riathaenaw a teing hae;

18 Looh phuin miakaw kha ry khyh hae zah,

chinaw koikua kalan a naekuh hae.

19 Tetuh mih vawsawnaw kyate

Bawipaw kalan sia hae zah,

aning nynh mih riathaenaw kyate a khum hae;

20 a bya kha sawnua hae zah a dansah hae,

te ronaw kyate a khum hae.

21 Atynpaw a sungsahnaw te

ccungccaw hae kya

a raepaw ngaeangnaw hae keiccuze

Bawipaw kalan lungtuabya ho hae sah.

22 Lungtua silawnaw rae hae sah lah,

lungtuanaw hlawsahte

a cyipaw kha ho hae sah.

23 Abang tuh sanphalung ccikute

rili vawlan cceih hae zah,

tui vawlan khe vuekuakunaw rya a lawkuh hae;

24 minmin nynh Bawipaw ryalawnaw te

tui akhupaw kya ngaeangthua lan umpaw

a ryalawnaw hae kha a muih hae.

25 Kawpya zah khise atho keiccuze

tuileih atho.

26 Sanphalung tuh vaawlui langkhe

hangkuh zah akhunaw langkhe a ccahbung;

ccungccaw hae tuh

mih vawsaw keiccuze mih lung athang;

27 Aruipaw hawte tangkitangkae lante

cceih hae zah, a khuliakuh hae,

mih nythyanaw balyn tuh phe thang.

28 Tetuh mih vawsawnaw kyate

Bawipaw kalan sia hae zah,

aning nynh mih riathaenaw kyate

poh a thuaa hae;

29 khise kha daesah zah,

rili tuileih tuh zya adae.

30 Tuhcite zya adae keiccuze

mih lungtua zah,

a ccia rynaw hae sanphalung

thadynnaw hmin kalan a thuakhae hae.

31 Atynpaw a sungsahnaw te

ccungccaw hae kya

a raepaw ngaeangnaw hae keiccuze

minmin nynh Bawipaw kalan

lungtuabya ho hae sah.

32 Ccungccaw zapi pumkunaw kyakhe

Bawipaw kha hangthung hae sah lah,

piccan hae tungkunaw kyakhe

amaw kha thehoysah hae sah.

33 Vawkhu hae kha laesia ram lang tangsah zah,

tuidy aphyhnaw kha mah

ram roupaw lang a tangsah,

34 Ram hoypaw kya a um hae paw

mih hoyleinaw keiccuze

tuh-e ram tuh loi-epaw

laethya ram lang a tangsah.

35 Laesia ram kha tuili lang tangsah zah,

ram roupaw kha

tuidy aphyhnaw lang a tangsah.

36 Te tuin kyakhe mih vuelawpaw kha

umsah hae zah, minmin nynh

um nawlan khuapi a raeku hae;

37 Loo kya ccacii tuu hae zah,

misu khokhu khe misu ku kha a lin hae,

looh patae a voisah hae.

38 A hythuanaw liate minmin tuh

patae pungzae hae zah,

mih sahiin kha mah zyasah bung khyh.

39 Minmin tuh tuaasahkunaw,

vawsawnaw te ngaethyanaw keiccuze

zyabung hae zah he a nyaabung hae te,

40 aning nynh uktu hae kha

maethyabong hae zah,

laanpi um leinaw ramkaw khe

a khiavuisaku hae;

41 thuasalama ryachi hae kha

riathaenaw kyate luesah hae zah,

mih innbyn hae kha tuuphu hawte

a pungzaesah hae.

42 Miding hae nynh tuh-e tuh

muih hae zah, mih lungtua,

hoyleinaw balyn nynh

a khalang kha a huku.

43 A haw hae paw nynh

e uccaw hae hynh peki hae sah lah,

Bawipaw sungsahnaw

atynpaw kha tua hae sah.