1 Pou Bawipaw , David te a teingpaw

vawsawnaw balyn kha liathuitua;

2 aning nynh Bawipaw kalan te

Athungpaw Jakob Pachia kalan

bya a kinkupaw kha liathuitua:

3-5 "Bawipaw hanlan hmin san kheit,

Athungpaw Jakob Pachia hanlan

umnaw hmin san kheit kha

ka muih mawlaezung,

ka inn lungkhu lang ka tee lan khyh zah,

ka ikhung vawlan ka kae lan khyh;

ka mit kha ka isah lan khyh zah,

ka mit-ving kha masite ka isah lan khyh," a ci.

6 Byakin thingkua kong kha

Efrathah ram kya kae thae zah,

Jaar loo kyakhe tuh-e tuh kae muih.✝

7 "A umnaw hmin kalan cceih oh sih lah,

a ccu a khangnawpaw kyakhe

beik oh sih," kae ci.

8 Pou Bawipaw , thokuh lah,

na huhan a umnahpaw

byakin thingkua rykhate

na umnaw hmin kalan cciatua.

9 Na ranpibawi hae nynh

dingnaw boeining kha

lawkuh hae sah lah,

alungzipaw na ccungccaw hae nynh

lungtuate sia hae sah.

10 Na seepaw David kha tuate,

na kya-e chitui thuh athuapaw

na ccungccapaw kha vua nan.

11 Bawipaw nynh David kyakhe

phe atynpaw byakinkunaw kha rae zah,

tuh-e byakinnaw kha roh lan khyh:

"Na ccapaw hae laku e lu kheit kha

na bawitungkhung vawlan ka nung cih.✝

12 Na ccapaw hae nynh ka byakin te

ka ccangpah cih hae paw

ka phunglang hae kha a zui hae ze,

mih ccapaw hae nynh mah

na bawitungkhung vawlan

zungzae a haung cih hae," na la ci.

13 Pawccecize Bawipaw nynh

Zion kha a po vae;

tuh-e tuh a umnaw lang a ry vae.

14 "E hynh zungzae

ka umnaw hmin nynh thua;

e hynh ka ry vae keiccuze,

e kya ka um cih.

15 Zion a looh kha

hythuanaw patae ka pya cih;

a ccungccaw ryachi hae kha

looh phe byn lan ka pya cih hae.

16 A ranpibawi hae kha

khumnaw boeining

ka lawsakuh cih hae zah,

alungzipaw a ccungccaw hae nynh

lungtuate a sia cih hae.

17 Tuin kyakhe David ki kikheit kha

ka toihsah cih; chitui thuh athuapaw

ka ccungccaw hanlan maeekhua kha

ka paccyn vae.✝

18 A rhaw hae kha thethya

ka ccousah cih hae,

thuasalama a bawilukhung tuh

a tungvaw khe a aw cih.