1 Ka lungpi athuapaw Bawipaw tuh

thehoyte um sah,

aning nynh rhawtuk nawlan ka kuih kha

ccangpah zah, rhawdou nawlan

ka kuihdung kha a ccangpya.

2 Aning tuh ka lungpi,

ka rhawlungrua,

ka khynnaw te yn luesahtu,

ka khawriaphua,

ka khynnawpaw,

minphuin ccangpaw hae kha

ka zakaw a sangsahtupaw nynh thua.

3 Pou Bawipaw , ccungccaw hynh

paw athua keiccu mou na peki?

ccungccaw hynh paw

athua keiccu mou na tua?✝

4 Ccungccaw hynh

vaekheit suepaw hy te nynh aloku;

ccungccaw ccyh tuh

azothyapaw mynlyh te nynh aloku.

5 Pou Bawipaw , vaawlui kha poh hung lah,

yn rungbung tua;

mua hae kha ty hae lah,

maeekhuh apou cih.

6 Khozaw kha laesakuh lah,

rhaw hae kha kaheikalah phiasakuh hae;

na the kha kaw lah, minmin kha roh hae.

7 Ahangnaw kyate na kuih kha dyng lah,

akhupaw tui kyate thuasah,

ramccang hae kuih kyate thuasah

yn luesah lah, yn khumtua,

8 mih khalang nynh hynbya ho zah,

mih ranglang kuih tuh

ahme leipaw nynh thua.

9 Pou Pachia, na kalan

hlaw thawpaw kha ka sah cih;

arui ruihaw umpaw tintang kha

kae khuapah cih.

10 Siapharan hae kha taenaw na pya hae zah,

na ryalahtu David kha na luesah.

11 A rysawthahpaw thaloi rhaw kyate

kae kha nae khum zah,

ramccang hae kuih kyate nae luesah,

mih khalang nynh hynbya kha ho zah,

mih ranglang kuih tuh

ahme leipaw nynh thua.

12 Kae ccapaw hae tuh

mino athua lya hae khe,

myarya hoy lan alepaw

thingku hawte thua hae sah lah,

kae ccanung hae tuh

siapharan inn sak nawlan

a aw hae paw apaki lang e

tungpi hawte thua vae hae sah.

13 Kae ccung-inn hae tuh

looh aphuinphuin te

phe beih sah;

kae tuu hae tuh kae loram kya

athong-asan te pungthung hae sah,

14 kae vaetua hae mah

ataw patae than hae sah.

khualungrua vikute

teenuakunaw um nan sah lah,

ramccang lang deekunaw um nan sah,

khua lungkhu e laanpi hae kya

lungriathaete siaruanaw um nan sah.

15 Tuhcihawpaw hythuanaw a umnaw

ccungccaw hae tuh

lungtua hae paw nynh thua;

Bawipaw tuh mih Pachia athuapaw

ccungccaw hae tuh

lungtua hae paw nynh thua.