1 Judah ram kya Pachia kha a ny hae;

a min tuh Israel ram kya a lesae.

2 Jerusalem kya Pachia bu a um,

amaw a umnaw hmin tuh

Zion nynh thua.

3 Tuin kyakhe dalahdalah akpaw

the hae, khawriaphua,

thaloi te rhaw zunghe hae kha

aning nynh a khya hae.

4 Nang tuh zungzae tynpaw

mua hae laeze na phu-ehua zah,

myarya na lesae.

5 Arawthungpaw rhaw hae kya-e

uccaw hae kha luade thua hae zah,

zya a ih vae hae;

rhaw hae tuh lu kheit sanmah

mih kuih hang kho vae khyh hae.

6 Pou Jakob Pachia,

na hu na raw hae keiccuze

marangle te marang ccikuh hae paw

tuh ningkuh hae zah a khuliakuh hae.

7 Thuasalama nang tuh

ri lan na um ccaccing!

na thinria ze, hummou na malang

a thadyn kho cih?

8,9 Laephi vawlan tuaasahnaw

a ing hae paw balyn kha

khum lan cite Pachia nynh

byapia khylan he a thokuh te,

vaawlang te byapianaw roi

a saw keiccuze

laephi tuh rih zah, zya adae.

10 Ccungccaw thinrianaw tuh

namaw thehoysah nawlan nynh

houh a tang, rhaw kyate

a hiinhy hae paw nynh

na poi kha a tua cih hae.

11 Bawipaw nae Pachia kalan

byakinkunaw rae oh lah,

tuh-e byakinkunaw thyhte cyih oh;

Pachia pepan um hae paw balyn nynh

rawri sawtua lan umpaw Pachia kalan

lasung ccyngpah hae sah,

12 tuh-e Pachia tuh uktu hae hiinnaw kha

a nesah bungpaw,

laephi siapharan hae kha

rinaw a hoisah hae paw nynh thua.