1 Vaawlui nynh Pachia phu-enaw kha

ho zah,

vaawlui kya adawkuhpaw nynh

a kuihhae kha a langsah.

2 Khuadae nynh khuadae kha

hopah pathy zah,

khuazi nynh khuazi kha

a hopya pathy.

3 Ho te mah ho khyh hae,

bya te mah pousah khyh hae;

mih roi kha thae lan um khyh;

4 tuhzemah mih roi tuh

laephi pynpi kya po zeihkuh zah,

mih bya tuh laephi athangnaw cia

phe a thua.

Pachia nynh khuanin hanlan

vaawlui kya bu a sakpya,✝

5 khuanin tuh a khaan lungkhu te

yn poupaw zudy ccangvaepaw hawte thuasah,

a laanpi kya lungtuate a ccuepaw

ccungccapaw athungpaw

hawte thuasah yn pou.

6 Vaawlui athangnaw voikheit langte

yn tho zah,

voikheit lang athangnaw cia

po a cceih;

amaw asonaw kyate a rekuh khopaw

pawpaw mah um khyh.

7 Bawipaw phung tuh

phe accingpaw thua zah,

hiinnaw kha a thawsah;

Bawipaw phunglang tuh

akyhpaw thua zah,

a haw leipaw kha a hawsah.

8 Bawipaw phungbya tuh

ahmepaw thua zah,

thinlung kha a lungtuasah;

Bawipaw kawbya tuh

ccaerarihpaw thua zah,

mit kha a awsah.

9 Bawipaw rawrinaw tuh

athyaapaw thua zah,

zungzae atyn;

Bawipaw phungzae hae tuh

akyhpaw thua zah,

zungzae adingpaw nynh thua.

10 Hynh-e hae hynh sui laeze thuasah,

sui ccipaw patae lae heize thuasah

ry lan a umhua hae paw nynh thua;

khoilutui laeze ehua zah,

khoidaw kyate accawpaw

khoitui laeze a ehua.

11 Tuhpiaze, e phungzae hae nynh

na ryalahtupaw kae kha

raeringnaw yn pya hae;

e phungzae hae zuinaw liate

myarya lepaw lasung a um.

12 Hummou amaw a cyiseinaw kha

a muihkuh kho?

Alangkuh leipaw cyiseinaw kyate

kae kha yn thyaasah.

13 Lungraroute seinaw kyate mah

na ryalahtupaw kae hynh

yn khyn sah lah,

hynh-e seinaw hae nynh kae kha

yn uk nan hae sah.

Tetuh ccaenaw um leipaw

ka thua cih zah,

myarya lepaw seinaw kyate

ka lue cih.

14 Ka khalang kya-e bya te

ka thinlung kya-e tuanaw tuh

na nawccawpaw lang tang sah,

Pou Bawipaw , ka lungpi te

yn shawkhawtu.