SAM 2

Pachia nynh Popaw Siapharan

1 Pawccemou minphuin hae nynh

aruh lante doukunaw

khuakhan hae zah,

ccungccaw hae nynh accakaepaw kha

a paccyn hae?✝2.1-2: Loc 4.25-26

2 Laephi siapharan hae te

uktu bawi hae nynh Bawipaw te

Bawipaw nynh chitui a thuhpaw kha

rawsete pynkheihlan khuakhankuh hae zah,

3 "Oun heenaw hae paw kha

thoh pae oh sih lah,

mih liarui hae kha aening kyate

vua oh sih," a ciku hae.

4 Vaawram kya a haungpaw tuh a nuin;

Bawipaw nynh minmin kha

a sarya hae.

5 Oute thinriate minmin kha

bya a hopah cih hae,

a thinrianaw nynh mih thin a phangsah hae,

6 "Ka siapharan kha athyaapaw

ka Zion mua vawlan ka nung vae," a ci.

7 Bawipaw phunglang kha

ka ho cih:

Aning nynh kae kha, "Nang tuh

ka ccapaw nynh na thua;

atunin nang kha kae saah vae.✝2.7: Loc 13.33; Heb 1.5, 5.5

8 Yn ngiakuh lah, minphuin hae hynh

na rho lang kae pya cih,

laephi athangnaw cia na pee cih.

9 Minmin kha sivaw hoitang te

na uk cih hae zah,

laephi ang hawte zoihtatyh lan

na koi cih hae," yn cipya.✝2.9: Bya 2.26-27, 12.5, 19.15

10 Pou siapharan hae, hawrarih lan

umtua oh.

Pou laephi uktu bawi hae,

raeringnaw pyanaw hynh lawku tua oh.

11 Bawipaw rya kha

rawrinaw te lah oh lah,

thyngkute 12 a malang bakhung oh,

tuhkhyhze tuh a thinria cih zah

laanpi kya na roh cih oh;

pawccecize a thinrianaw tuh

maee lang palou arua.

Amaw kya a rekuh hae paw balyn tuh

lungtua hae paw nynh thua.