1 Pou athungpaw ccungccapaw,

Pachia a beik hae paw tungvaw

rysawthyanaw kyakhe

pawccemou na pooku?

2 Anin ninlang ro lanpaw kha

na paccynku.

Na lae tuh ahepaw sangteih te

lokuh zah, hynbya kha a ho.

3 Ahoypaw laeze athahpaw kha

na ryhua zah,

byaccing laeze hynbya kha na ryhua.

4 Pou ahynpaw lae, nang tuh

ronaw bya balyn kha na sungsah.

5 Tukeiccuze Pachia nynh

zungzae ae roh cih;

na bu kyate ccaring ae sue cih zah

thoh ae pae cih;

ahiin hae paw ram kyate

dae ae thua cih.

6 Miding hae nynh hoyleinaw

a rae hae paw kha a muih cih hae zah

a rih cih hae, te a nuinse cih hae zah,

7 "Pachia kya reku leite,

hoirumnaw patae kha doliakuh zah

sisua kya khynnaw a ccungkuhpaw khuh

dotua oh!" cite a ho cih hae.

8 Thuasalama kae tuh Pachia inn kya-e

hinlalyhpaw oliv ku te nynh kae loku.

Pachia sungsahnaw atynpaw kha

zungzae te zungzae cia ka doliaku.

9 Na cyipaw uccaw keiccuze

na tungvaw ka lungtua zungzae cih.

Na hoy keiccuze alungzipaw

na ccungccaw hae a umnaw hae kyakhe

na min kha ka siakhae cih.