1 Bawipaw kha thehoysah oh!

Lungzi hae paw a pumkunaw hae kyakhe

Bawipaw thehoysahnaw

hlaw athawpaw kha sah oh.

2 Israel tuh amaw a Raetupaw tungvaw

a lungtua sah;

Zion ccaaw hae tuh

mih Siapharan tungvaw

mih lungtua sah.

3 Minmin nynh law biate a min kha

thehoysah hae sah,

tyng te tintang khuakute amaw kalan

roi hoypaw saw hae sah.

4 Pawccecize Bawipaw tuh

a ccungccaw hae kya a lungrythua;

zakawsangsakuh hae paw kha

taenaw te a ccaan hae.

5 Lungzi hae paw tuh

phu-ete mih lungtua sah;

mih iphae vawlan khe

lungtuate hlawsah hae sah.

6 Mih khalang te Pachia

thehoysahnaw roi kha

thawte saw hae sah lah,

mih kuih kyakhe kyng ning ahepaw

thaloi kha ccyngkuh hae sah,

7 tuh-e tuh minphuin

ccangpaw hae kha liaru khylan,

ccungccaw hae detah khylan,

8 te mih siapharan hae kha

sivawrui te khii khylan te

mih uktu hae kha

sivaw bawtary te khii khylan,

9 te tuh-e ccungccaw hae tungvaw

Pachia kawpyanaw thyhte

byapianaw rae khylan nynh thua.

E hynh alungzipaw

a mithyaa hae balyn hanlan

phu-enaw nynh thua.

Bawipaw kha thehoysah oh!